Gjykata e Apelit në Tiranë ka vendosur të lërë në fuqi masën e sigurisë “arrest në burg” për Xhino Agon, duke konfirmuar vendimin e marrë më 05.12.2025 nga Gjykata e Shkallës së Parë të Juridiksionit të Përgjithshëm Elbasan.
Apeli ka ndryshuar vetëm një pikë të vendimit, e cila lidhet me vlerësimin e arrestimit në flagrancë për personin nën hetim. Trupa gjykuese e Apelit e ka shpallur të paligjshëm arrestimin në flagrancë, duke argumentuar se Xhino Ago nuk është prangosur në kushtet e flagrancës.
Pavarësisht këtij vlerësimi, Gjykata e Apelit ka vendosur të mos ndryshojë masën e sigurisë, duke e konsideruar të ligjshme dhe të nevojshme vijimin e arrestit në burg.
Xhino Ago dyshohet si bashkëpunëtor në vrasjen e Mondi Mëhallës, ndërsa hetimet ndaj tij vijojnë. Burime nga organet e drejtësisë bëjnë me dije se dosja përmban të dhëna dhe prova që lidhen me rolin e tij të dyshuar në këtë ngjarje kriminale.
