Albers Keko arrin më në fund të jetë protagonist me gol për Partizanin. I riu, i ardhur me shumë pritshmëri nga Korabi në verë, dalëngadalë po arrin të fitojë vendin e vet të kampionët, që kanë sulmin me më shumë emra në Superiore. Në derbi bëri goditjen që u devijua nga Mensah në rrjetë, ndërsa ndaj Teutës lëshoi një tjetër goditje, që u devijua nga Bilali, por këtë herë goli i përket tërësisht atij. Në një intervistë për “Panorama Sport”, Keko tregon për golin, emocionet, synimet për titullin dhe ecurinë e tij në këtë start të aventurës me Partizanin.
Ndeshja e katërt në këtë sezon që Partizani e fiton në minutat e fundit. Çështje cilësie apo fati?
Besoj se është më shumë fryt i punës së përditshme që ne bëjmë në stërvitje, këmbënguljes së gjithë ekipit, por edhe meritë e stafit teknik, që përpiqet të përgatisë çdo detaj të mundshëm gjatë javës.
Kush ju ka shijuar më shumë, ky gol apo asisti për Mensahun në derbi?
Nuk dua të ndaj asnjërin prej këtyre momenteve. Vetëm e them me bindje se të tjerë do të vijnë dhe do të realizohen në të ardhmen.
Do të donit të kishit më shumë minuta në këto muaj te të kuqtë?
Kjo është një pyetje që e ka edhe përgjigjen brenda. Sigurisht që do të doja të kisha më shumë minuta në këmbë, por besoj se do të vijnë rrjedhimisht nga puna që bëj çdo ditë.
