Familjarë, miq, kolegë, politikanë e personalitete të artit e kulturës i dhanë sot lamtumirën e fundit publicistit dhe analistit Artur Zheji, i cili ndërroi jetë dy ditë më parë në moshën 64-vjeçare nga një arrest kardiak, në Sarandë.
Homazhet për një prej zërave më të veçantë të gazetarisë dhe mendimit publik shqiptar, u mbajtën për rreth dy orë e gjysmë (10:00-12:00) në Universitetin e Arteve të Bukura, aty ku ai u diplomua për regji.
“Pas Zhejit që kemi parë në ekrane, ka qenë një Zhej akoma më artist, më krijues, që do jepte shumë më tepër në vitet që do vinin. Një ikje e parakohshme”, tha ministri Blendi Gonxhja.
Për kreun demokrat, Sali Berisha, Zheji ishte një personalitet i spikatur i gazetarisë dhe analizës politike.
“Artur Zheji ishte një zë në vete në analizat e tij, në të cilat edhe po të mos ishe dakord me pikëpamjen, mënyrën civile të servirjes dhe të shtruar të mbrojtjes që ai bënte, do ta respektoje patjetër”, tha Berisha.
Për aktorin Timo Flloko Zheji ishte “një artist i madh në shpirt, me një sensibilitet të padallueshëm, të dukshëm, por të thellë e të brendshëm. Një erudit i përmasave të mëdha.”
Aktorja Rajmonda Bulku e përshkroi si një njeri të jashtëzakonshëm dhe të mençur.
“Lindi nga dy prindër me shpirt të lirë, nga atdhetarë, nga një artiste e mrekullueshme Besa Imami dhe Petro Zheji, mendje ndritur, i njerëzve të shquar shqiptarë. Lindi i lirë nga këta të dy, lindi i mençur, i kulturuar. Luftoi tërë jetën e tij për të thënë fjalën e drejtë, të mençur. Elokuenca e tij ishte e jashtëzakonshme dhe e pakrahasuar”, tha ajo.
Sikurse edhe kryeministri Albin Kurti i cili tha një ditë më parë se Zheji ndërkombëtarizoi çështjen e Kosovës, edhe ish-ministri i Jashtëm Paskal Milo konfirmon të njëjtën gjë.
