Nga Ervin Leka
Heronjtë e Paekspozuar!
Letër nga një polic i thjeshtë
Në vetëm 10 ditë, ne – punonjësit e Policisë së Shtetit – përballuam tre nga sfidat më të mëdha të viteve të fundit: zhvillimin e Giro d’Italia në Shqipëri, administrimin e sigurisë gjatë Procesit Zgjedhor 2025 dhe ruajtjen e rendit në një nga ngjarjet më të rëndësishme në Shqipëri, Samitin e KPE-së.
Pas çdo dite pune fshihet një realitet që pak e dinë: orë pa gjumë, net pa kthyer në shtëpi, lodhje fizike e mendore, ushqim me nxitim dhe mungesë e qetësisë minimale.
Përtej uniformës ka njerëz – prindër, bashkëshortë, vajza e djem – që mbajnë barrën e sigurisë publike në heshtje dhe shpesh pa falënderime.
Ne jemi mes sektorëve më pak të paguar në administratë. Ndërkohë që kërkohet profesionalizëm, sakrificë dhe gatishmëri 24/7, shpërblimi për mundin tonë është i pamjaftueshëm.
A mendon ndokush për ne?
Nuk kërkojmë lëvdata, por vlerësim të drejtë. Nuk kërkojmë privilegje, por një shpërblim të merituar – një rritje page që do të na jepte jo vetëm mbështetje ekonomike, por edhe moral, motivim dhe dinjitet në raport me punën që bëjmë për sigurinë e vendit.
Çfarë i kushton shtetit të tregojë kujdes për ata që e mbrojnë atë çdo ditë?
Me respekt,
Një polic i thjeshtë!
