Fjala e kryebashkiakut të Gramshit, Besian Ajazi, në lidhje me helmimin në kopshtin publik nr. 1 ngre më shumë pikëpyetje sesa jep sqarime. Ai tenton të minimizojë rastin duke e quajtur si “jo masiv” dhe flet për “tollovitje portalesh”, ndërkohë që Instituti i Shëndetit Publik (ISHP) konfirmon 17 fëmijë të infektuar me salmonelë – një shifër që nuk është aspak e vogël për një institucion parashkollor me rreth 60 fëmijë.
Ndër çështjet më problematike në deklaratën e Ajazit janë:
1. Paqartësi dhe shmangie nga përgjegjësia
Kryebashkiaku thekson se ende nuk ka përgjigje të analizave dhe sugjeron se nuk ka prova për helmim nga ushqimi. Megjithatë, ISHP ka konfirmuar shkakun bakterial (salmonela), çka tregon se burimi me shumë gjasë është pikërisht ushqimi. Ai nuk jep asnjë informacion konkret për:
-
Kush është kompania që furnizon produktet ushqimore?
-
Cilat janë masat konkrete që janë marrë pas rasteve?
-
A janë pezulluar përkohësisht punonjësit përgjegjës apo është mbyllur përkohësisht kuzhina?
2. Devijim i debatit drejt politikës
Në vend që të fokusohet tek shëndeti i fëmijëve dhe masat parandaluese, Ajazi devijon drejt sulmeve politike, duke akuzuar një prind (që është edhe kundërshtar i tij politik) për protagonizëm dhe përfitim politik. Kjo është një përpjekje e qartë për të shmangur vëmendjen nga përgjegjësitë institucionale dhe për ta personalizuar çështjen.
3. Konfuzion në komunikim
Nga njëra anë thotë se “nuk kemi përhapje”, nga ana tjetër thotë “jemi në alert”. Ai mohon numra të lartë pa dhënë numra zyrtarë, ndërsa ISHP i publikon. Kjo tregon për mungesë transparence dhe koordinimi institucional./Maska.al/
Kryebashkiaku i Gramshit, Besian Ajazi: Në ditët e fundit është shfaqur një rast, më pas u bënë dy dhe 6, fëmijë nga i njëjti kopsht që morën ndihmë mjekësore në spitalin e Gramshit, Kjo na vuri në alert. Dua që nëpërmjet jush të sqaroj disa të pavërteta të mëdha në këtë histori tollovitje portalesh, nuk kemi të bëjmë me 672 raste helmimi, as me 72 fëmijë të shtruar apo helmim për shkak të ushqimit, sepse ende nuk kemi përgjigjen e analizave. Nuk kemi të bëjmë me raste abuzimi, por me një fakt që e dimë mirë të gjithë, që janë evidentuar disa raste me salmonelë në një kopsht publik. Ushqimi nuk funksionon me katering, por me furnizim nga një kompani dhe me gatim në ambientet e kopshtit me kuzhinier që prej vitesh ushqejnë vogëlushët. Ky është rasti i parë që ka ndodhur. Nuk e dimë ende se çfarë ka ndodhur sepse vijon hetimi. Jemi në alert për gjendjen shëndetësore të vogëlushëve. Fatmirësisht nuk kemi të bëjmë me një rast masiv.
Ai thotë se ngjarja nuk është tentuar që të fshihet.
Kryebashkiaku i Gramshit, Besian Ajazi: A mbulohet dielli me shoshë, jo? Nuk ka tentativë të tillë. Bashkia ka përgjegjësitë e veta, përgjegjësia jonë nëpërmjet inspektorit tonë është në momentin që bëhet furnizimi me produktet ushqimore, kërkojmë fletën e analizave për çdo ushqim, dhe nuk është pranuar ndonjë produkt ushqimor pa fletë analize. Unë, më intereson gjendja shëndetësore e vogëlushëve, gjendja edhe shpirtërore e prindërve të tyre, por asgjë tjetër veç kësaj që nuk lidhet me këtë rast, por me protagonizmin lokal provincial të ndonjë palaçoje politik. Nuk mundet që kryetari i bashkisë të dijë vlerën e tenderit, di që procedura është e rregullt. Numri është diku te 60 e pak fëmijë në atë kopsht, fatmirësisht kemi vetëm atë numër të të prekurve, s’kemi përhapje. Besoj se s’do të kemi raste të tjera. Të dalë një që të thotë se kush ka bërë presion. Po shfrytëzon rastin e fëmijës së vet për të bërë politikë, s’do të doja të ndodhesha në atë situatë dhe të bëja politikë me rastin tim. Askush nuk ka bërë presion, asnjë lloj intimidimi. Është kopsht që i përmbledh të gjithë, punonjësit në shtet e privat, nuk ka asnjë pretendim të tillë të vërtetuar dhe të faktuar.
