Më shumë se 510,000 pasagjerë janë ndikuar nga greva e sotme 24-orëshe në të paktën dhjetë aeroporte në Gjermani , e cila filloi në mesnatë.
Mediat gjermane bëjnë me dije se mbi 3,400 fluturime janë anuluar në Gjermani si pasojë e grevës.
Fluturimet janë anuluar në aeroportet e Frankfurtit, Mynihut, Berlinit, Dyseldorfit, Bon/Këlnit, Shtutgartit, Leipzigut, Bremenit dhe Hamburgut.
Në aeroportin më të madh të Gjermanisë, në Frankfurt, llogaritet se afërsisht 150 mijë pasagjerë nuk do të mund të udhëtojnë me fluturimet e tyre të planifikuara, ndërsa nuk do të funksionojnë as fluturimet“transit”.
Sindikata ‘Ver.di’ ka bërë thirrje për grevë të punëtorëve në sektorët e sigurisë së avionëve dhe pasagjerëve dhe në sektorin e pilotëve, përpara raundit të tretë të negociatave me punëdhënësin.
Sindikalistët kërkojnë rritje 8% të pagave dhe të paktën 350 euro më shumë të ardhura mujore, shpërblime më të larta për punën në periudha presioni dhe tre ditë shtesë pushimi.
Punëdhënësit deri më tani i kanë hedhur poshtë kërkesat si të pabaza dhe nuk kanë paraqitur kundërpropozim.
