Ka përfunduar procesi i numërimit të votave të diasporës për qarkun e Fierit, duke konfirmuar përfundimisht ndarjen e mandateve në këtë zonë elektorale. Partia Socialiste ka arritur të ruajë mandatin e 12-të, duke forcuar pozitat e saj edhe pas përfshirjes së votave të emigrantëve.
Nga lista e mbyllur, PS do të përfaqësohet në Kuvend nga pesë kandidatë: Belinda Balluku, Petrit Malaj, Kiduina Zaka, Erjo Mile dhe Ana Nako.
Ndërkohë, nga lista e hapur të mandatuar si deputetë janë: Ceno Klosi, Klevis Jahaj, Asfloral Haxhiu, Antoneta Dhima, Elton Korreshi, Zegjine Çaushi dhe Dhimitër Kruti.
Nga ana tjetër, koalicioni PD-ASHM siguron 4 mandate në Fier, të cilat i takojnë kandidatëve të listës së mbyllur: Gazment Bardhi, Luan Baçi, Brunilda Haxhiu dhe Saimir Korreshi.
Rezultati përfundimtar në këtë qark pasqyron ndikimin e kufizuar që pati vota e diasporës në ndryshimin e balancave politike, duke konfirmuar dominimin e Partisë Socialiste në Fier.
