Gjykata Kushtetuese ka vendosur në favor të ish-kryeministrit Sali Berisha, duke konstatuar se masa e arrestit shtëpiak ndaj tij ishte mbajtur përtej afatit të arsyeshëm.
Vendimi u mor gjatë seancës së sotme dhe u shpall pa praninë e palëve.
Sipas Top Channel, Kushtetuesja ka pranuar argumentet e mbrojtjes së Berishës, duke rrëzuar tre vendime të shkallëve më të ulëta të drejtësisë.
Sali Berisha është marrë i pandehur për korrupsion pasiv, në procesin e privatizimit të pronave të ish-kompleksit sportiv “Partizani”.
Sipas SPAK, ai dyshohet se ka përdorur postin e tij si kryeministër për të ndikuar në vendime ligjore dhe administrative, me qëllim që procesi të përfitonte familjarët e tij, përfshirë dhëndrin Jamarbër Malltezi.
Gjatë periudhës së arrestit shtëpiak, mbrojtja ka kundërshtuar vazhdimisht zgjatjen e masës duke theksuar se kushtet ligjore nuk ishin më të vlefshme. Në janar 2025, masa u zëvendësua me detyrim paraqitje.
