Një tragjedi familjare ka ndodhur pasditen e së enjtes në një apartament në rrugën Général-Paulet në Brest (Francë) ku sipas mediave lokale, një burrë dhe një grua shqiptare janë gjetur të vdekur. Autoritetet franceze po hetojnë me pistën kryesore atë të vrasjes së gruas nga burri, e ndjekur nga vetëvrasja e tij.
Alarmi u dha rreth orës 16:30, kur një banor i zonës lajmëroi policinë pasi dëgjoi dy të shtëna me armë zjarri. Kur mbërritën forcat e rendit në vendin e ngjarjes, ato zbuluan trupat e pajetë të çiftit shqiptar, të moshës 30 dhe 36 vjeç, si dhe një pushkë gjahu pranë tyre. Burimet e gazetës franceze “Le Télégramme” konfirmuan se hetimi po përqendrohet te skenari i vrasjes së gruas nga partneri, i cili më pas dyshohet se i ka dhënë fund jetës së tij.
Tragjedia është veçanërisht e rëndë për shkak të faktit se çifti kishte dy fëmijë. Njëri prej tyre ishte kthyer në shtëpi pas të shtënave, por fatkeqësisht nuk kishte mundur të hynte në banesë, ndërsa fëmija i dytë, më i vogël, ndodhej në shkollë në momentin kur ndodhi tragjedia. Deri në këtë moment, Prokuroria ende nuk ka dhënë detaje zyrtare lidhur me identitetin e viktimave.
