Një ngjarje e pazakontë dhe mjaft domethënëse është shënuar gjatë numërimit të votave nga diaspora në kuadër të zgjedhjeve të fundit në Shqipëri. Gjatë hapjes së një zarfi të ardhur nga jashtë vendit, komisionerët kanë hasur jo një fletë votimi, por një mesazh të shkruar me dorë nga vetë emigranti.
Në vend të votës, qytetari ka lënë një shënim të shkurtër, por mjaft domethënës:
“Mungonte fleta e votimit…
Më vjen keq që nuk më dhatë rastin të votoj…”
Mesazhi i emigrantit ka ngjallur reagime të shumta në rrjetet sociale, ku përdorues të shumtë kanë vënë në dyshim seriozitetin dhe transparencën e votimit nga jashtë vendit, një proces që për herë të parë synonte të përfshinte shqiptarët e diasporës në vendimmarrjen politike të vendit.
Në këtë shënim të thjeshtë, qytetari jep një dëshmi të drejtpërdrejtë të asaj që e konsideron si pamundësi për të ushtruar të drejtën e tij kushtetuese për të votuar, duke ngritur hije dyshimi mbi procesin logjistik të shpërndarjes së fletëve të votimit nga Komisioni Qendror i Zgjedhjeve.
Ky rast është përmendur gjithashtu nga përfaqësues të opozitës dhe analistë si një tjetër provë e asaj që ata e quajnë “manipulim i orkestruar shtetëror” dhe “përdorim politik i votës së diasporës” nga strukturat e pushtetit.
KQZ ende nuk ka reaguar zyrtarisht mbi këtë incident, ndërsa kërkesat për hetim dhe transparencë në lidhje me dërgimin dhe administrimin e fletëve të votimit nga jashtë po rriten.
Nëse konfirmohen raste të ngjashme, mund të kemi të bëjmë me një nga skandalet më serioze që ka prekur procesin zgjedhor shqiptar, pikërisht në një fazë që duhej të sillte më shumë besim dhe pjesëmarrje qytetare.
