Denoncimet e shqiptarëve për kompaninë e sigurimeve ANSIG sa vijnë e shtohen. Së fundmi një qytetar i shqetësuar ka kërkuar ndihmën e redaksisë sonë pas një aksidenti automobilistik që ka ndodhur në autostradën Tiranë-Durrës katër muaj më parë. Ai është goditur nga pas nga një vajzë e siguruar pranë kompanisë ANSIG dhe, pavarësisht faktit që dëmet e makinës janë vlerësuar në 400 mijë lekë të vjetra, kompania ende nuk e ka dëmshpërblyer. Qytetari tregon se ka rregulluar makinën me lekë borxh dhe për katër muaj me radhë ka marrë vetëm premtime boshe, por deri më tani nuk është marrë asnjë masë konkrete.
Ai tregon se ka komunikuar disa herë me ANSIG, si online ashtu edhe pranë zyrës së tyre në afërsi të Tajvanit në Tiranë, por zgjidhja e problemit të tij vazhdon të shtyhet. Qytetari shprehet se është në hall të madh, pasi për shkak të vonesës në dëmshpërblim ka vështirësi financiare dhe kërkon që rasti i tij të bëhet publik për të sensibilizuar institucionet përkatëse dhe për të marrë më në fund atë që i takon me të drejtë. Kjo nuk është hera e parë që shqiptarët denoncojnë kompaninë e deputetit socialist Anastas Angjeli, për mashtrime dhe zvarritje të procesit të dëmshpërblimit.
Qytetari denoncon:
Prsh, JOQ Albania, së pari dua tju them që jeni të mrekullueshëm sepse ju keni zgjidhur shumë probleme të popullit dhe keni ndihmuar shumë njerëz ! Unë që po ju shkruaj kam 4 muaj që kam bërë një Aksident por pa pasoja të rënda vetem dëme makine dhe mua më kanë rënë nga pas në Autostradën TR-DR dhe tani unë e kam rregulluar makinën time me lekë borxh dhe siguacioni i Vajzës (ANSIG) që më ka goditur nga pas Akoma nuk më ka dëmshpërblyer me vlerën 400 mijë lekë të vjetra unë jam hallexhi dhe ai i servisit don lekët dhe unë kam 4 muaj që po më thonë lekët janë në financë dhe do ti hedhim sot do ti hedhim neser në llogari edhe kshu që ju lutem bëjeni publike këtë problem sepse jam shumë në hall sinqerisht! Ka 3 ditë që shkruajta me ta dhe më thanë që do flasim prap me financën dhe as smë kanë kthyer më përgjigje kjo ka që në fillim të prillit që po ju shkruaj dhe kam vajtur edhe tek zyra qe kanë ANSIG afër Tajvanit në Tiranë dhe më thonë që mos u mërzit se do e rregullojmë këtë punë po asgjë nuk po bëjnë unë jam hallexhi nuk më kanë tepruar lekët që ti pres ata 1 vit apo sa duan ata. Ju falënderoj dhe ju uroj gjith të mirat Redaksia JOQ Albania jeni të mrekullueshëm!
/Joq Albania/
