Erion Veliaj, i shkarkuar më 25 shtator nga detyra e kryetarit të Bashkisë së Tiranës, ka ankimuar vendimin në Gjykatën Kushtetuese. Në ankimin e tij theksohet se një kryebashkiak nuk mund të shkarkohet pa një shkelje të rëndë të provuar dhe se vendimi është i paligjshëm dhe antikushtetues.
Këshilli Bashkiak i Tiranës votoi pro shkarkimit të tij javën që lamë pas urdhrit të Kryeministrit Edi Rama, në asamblenë e Partisë Socialiste, ku u bë publike edhe emri i Ogerta Mamastriliut si kandidate për të qenë pasuesja e Veliajt.
Rama u shpreh se shkak për shkarkimin e Veliajt u bë mosparaqitja në detyrë për më shumë se tre muaj. Në kërkesën e dorëzuar në Kushtetuese, Veliaj sqaron se mungesa nuk ishte me vullnetin e tij, por pasojë e një mase sigurie që ai synon ta kundërshtojë në të gjitha shkallët e gjyqësorit.
Për çfarë akuzohet Veliaj?
SPAK ka përfunduar hetimet dhe ka dërguar për gjykim dosjen e tij në Gjykatën e Posaçme. Veliaj përballet me 13 akuza, ndërsa bashkëshortja e tij, Ajola Xoxa, me 12 akuza. Sipas SPAK, çifti në të paktën 9 raste ka marrë përfitime të parregullta monetare dhe pasuri të paluajtshme nga kompani dhe OJF, të cilat më pas kanë përfituar leje ndërtimi dhe fonde publike nga Bashkia e Tiranës.
Në dosje thuhet se Veliaj, me nënshkrimin e tij si kryebashkiak, ka miratuar shpërndarjen e fondeve publike që kanë përfunduar në OJF të lidhura me bashkëshorten dhe individë të afërt me të. Përmes këtij skemi, sipas SPAK, ata kanë përfituar edhe pasuri të paluajtshme në vlera të konsiderueshme.
