Detaje të reja kanë dalë në dritë në lidhje me ngjarjen e ndodhur mbrëmjen e djeshme në zonën e Vrinës, Bashkia Konispol, ku u zbulua një sasi lënde eksplozive e vendosur në automjetin e 57-vjeçarit Mirash Gjikola.
Sipas burimeve, Gjikola rezulton të jetë person me precedent penal, i dënuar më herët me 8 vite burg për tentativë vrasjeje. Mësohet se ai ishte zhvendosur prej kohësh nga Lezha dhe jetonte aktualisht në Shëndëlli, pranë Konispolit.
Eksplozivi ishte vendosur në automjetin e tij dhe dyshohet se ishte i destinuar për t’u shpërthyer, por ngjarja u parandalua pasi vetë drejtuesi i mjetit e konstatoi gjatë lëvizjes dhe njoftoi menjëherë policinë.
Në lidhje me këtë ngjarje, policia ka shpallur në kërkim shtetasin Dedë Gjini, i cili dyshohet si person i përfshirë në vendosjen e eksplozivit.
Autoritetet nuk përjashtojnë pistën e hakmarrjes apo konfliktit të mëparshëm, duke marrë parasysh të kaluarën kriminale të 57-vjeçarit, ndërkohë hetimet vijojnë për zbardhjen e plotë të rrethanave, motivit të ngjarjes dhe identifikimin e personave të tjerë të mundshëm të përfshirë.
