Një dokument i administruar nga Komisioni i Pavarur i Kualifikimit (Vetting) hedh dritë mbi një marrëdhënie kontraktuale të Adriatik Lapajt me një fondacion që i referohet si “S.” – i identifikuar gjerësisht si Fondacioni Shoqëri e Hapur, i financuar nga George Soros. Ky dokument del në kundërshtim të plotë me deklaratat publike të z. Lapaj, i cili ka mohuar në mënyrë të përsëritur çdo lidhje të tillë.
Në vendimin e publikuar gjatë procesit të rivlerësimit të gjyqtarit Alltun Çela, përmendet qartazi se dhëndri i tij, i identifikuar me inicialet A.L., ka qenë:
“i punësuar me kontratë pranë fondacionit ‘S.’, dhe profesionin e avokatit e ushtron jashtë orarit të përcaktuar në kontratë.”
Ndërsa më herët, vetë Adriatik Lapaj ka deklaruar publikisht:
“Nuk kam qenë asnjëherë i punësuar në fondacionin Soros, as nuk kam pasur kontratë me ta. Kam ofruar shërbime si avokat për disa raste të caktuara dhe kaq.”
(Deklaratë e bërë gjatë vitit 2024, kur u përfshi në debatin publik mbi mbështetjen e lëvizjes së tij “Shqipëria Bëhet”)
Sipas dokumentit të Vettingut, kjo marrëdhënie kontraktuale është thelbësore për të sqaruar konfliktin e interesit në një çështje konkrete. Në të theksohet:
“Ai (A.L.) nuk ka pasur dhe nuk ka zyrë avokatie në qytetin e Sarandës dhe aq më pak në këtë objekt. Ai është i punësuar me kontratë pranë fondacionit ‘S.’…”
Kjo përbën një kontradiktë të qartë midis asaj që është dokumentuar zyrtarisht dhe asaj që është deklaruar publikisht nga Lapaj.
Ky zhvillim ngre pikëpyetje të reja mbi transparencën dhe narrativën që ka ndërtuar kandidati i mundshëm për garën elektorale, i cili shpesh e ka përdorur distancimin nga fondacionet ndërkombëtare si pikë kyçe të diskursit të tij politik.
Maska.al do të vijojë ndjekjen e kësaj çështjeje dhe është në kërkim të një reagimi nga vetë z. Lapaj lidhur me këtë dokument zyrtar.
