Një ngjarje e rëndë është shënuar pasditen e së enjtes në Anzola dell’Emilia, Bologna të Italisë. Një 33 vjeçare, Sofia Stefan , ish police, u vra me armë zjarri nga një koleg 60 vjeçar në komisariatin e policisë.
Polici, Giampiero Gualandi, nuk bëri rezistencë kur u arrestua.
Sipas asaj që raportojnë mediat italiane, në dëshminë e parë, autori ka deklaruar se e ka qëlluar aksidentalisht, pasi ai ka qenë duke pastruar armën.
Policia mjeko-ligjore dhe karabinierët ndodhen në vendngjarje.
Menjëherë pas kësaj ngjarje të rëndë ka reaguar edhe kryebashkiaku i Anzola Bolognese, Giampiero Veronesi, i cili ka deklaruar se është i tronditur nga gjithë kjo që ka ndodhur.
“Jam vërtetë zemërthyer dhe i tronditur që diçka e tillë mund të ndodhë në Bashkinë tonë, e cila është shumë e vëmendshme dhe gjithmonë në vijën e parë kundër dhunës ndaj grave. Ne mblidhemi rreth familjes së kësaj vajze”, u shpreh Veronesi.
Pavarësisht deklaratave të Gualandit, policia po heton edhe pistën e krimit të pasionit, pasi dyshohet se mes dy kolegëve mund të ketë patur edhe romancë të fshehtë, por që mund të jetë prishur kohët e fundit nga policja që mbeti e vrarë.
