Një aksident me tre automjete të përfshira në një përplasje zinxhir është regjistruar mbrëmjen e kësaj të diele në autostradën Rrogozhinë-Lushnjë. Aksidenti ka ndodhur pranë rrethrrotullimit të Grabjanit, në kahun e lëvizjes drejt Lushnjës.
Si pasojë e përplasjes, njëri prej drejtuesve të mjeteve ka mbetur i plagosur dhe është transportuar në spitalin e Lushnjës, ku po merr ndihmën mjekësore. Sipas të dhënave paraprake, ai ka marrë disa lëndime, por ndodhet jashtë rrezikut për jetën.
Dyshohet se shkak i aksidentit është bërë një automjet që ka humbur kontrollin dhe është përmbysur në rrugë. Për të shmangur përplasjen me të, drejtuesi i një automjeti tip Benz ka frenuar papritur, ndërsa mjetet që vinin pas tij janë përplasur njëri pas tjetrit.
Në vendngjarje kanë mbërritur shërbimet e policisë rrugore, të cilat po punojnë për disiplinimin e trafikut, pasi aksidenti ka shkaktuar rëndim të qarkullimit në këtë segment. Ndërkohë, edhe shërbimet zjarrfikëse të Lushnjës janë angazhuar për pastrimin e rrugës nga mbetjet e automjeteve të përfshira në aksident.
Ekspertët e policisë po kryejnë veprimet për dokumentimin e plotë të ngjarjes dhe përcaktimin e rrethanave të saj.
