Forcat RENEA janë futur nga tarraca e pallatit në zonën e Astirit për të arritur në banesën ku u raportua se ndodhej një vajzë, e cila kishte denoncuar në polici se ishte dhunuar nga disa persona.
Sipas informacioneve të policisë, shtetasja S.Q kishte telefonuar në sallën operative duke deklaruar se ndodhej në katin e 8-të të një pallati dhe se ishte dhunuar nga disa individë. Pas denoncimit, forcat e rendit, së bashku me Grupi Hetimor dhe shërbimet zjarrëfikëse, mbërritën menjëherë në vendngjarje.
Pavarësisht ndërhyrjes së forcave të policisë, vajza ka mbyllur derën e banesës dhe ka refuzuar të bashkëpunojë, duke krijuar një situatë të tensionuar. Për të siguruar kalimin në banesë dhe për të mbrojtur qytetaren, RENEA ka ndërhyrë duke hyrë nga tarraca e pallatit.
Aktualisht, forcat e rendit janë duke negociuar me shtetasen S.Q për të siguruar situatën dhe për të ofruar ndihmën e nevojshme, ndërkohë që një ambulancë është mbërritur në vendngjarje për të siguruar asistencën e nevojshme mjekësore. Po ashtu, po vijon hetimi për zbardhjen e plotë të ngjarjes dhe identifikimin e autorëve të mundshëm të dhunës.
