Agjencia e Mbikëqyrjes Policore (AMP) ka arrestuar dy punonjës policie në Sarandë dhe Has për shkelje të rregullave të qarkullimit rrugor, përkatësisht për drejtim të mjetit në gjendje të parregullt dhe aksident me pasoja materiale e njerëzore.
Sipas njoftimit zyrtar, AMP (Rajoni Vlorë-Gjirokastër) ka arrestuar në flagrancë Inspektor A.K., efektiv i Forcës së Posaçme “Shqiponja” në Komisariatin e Policisë Sarandë.
Ai dyshohet se, duke drejtuar mjetin tip “Mercedes Benz” në qytetin e Sarandës, është përplasur me një automjet tjetër të tipit “Volkswagen”, duke shkaktuar dëme materiale. Testi i alkoolit konfirmoi praninë e alkoolit në gjakun e tij.
Ndërkohë, në Has, AMP (Rajoni Kukës-Dibër) ka ndaluar Inspektor H.D., 53 vjeç, me detyrë oficer patrulle në Komisariatin e Policisë Has, i cili dyshohet për shkelje të rregullave të qarkullimit rrugor.
Ai, duke drejtuar automjetin e tij tip “Volkswagen” në rrugën “Demokracia” në qytetin e Krumës, ka përplasur dy këmbësore, përkatësisht 43 dhe 78 vjeçe, të cilat po marrin ndihmë mjekësore.
