Pas dhjetë ditësh sulme të intensifikuara në Lindjen e Mesme, bilanci i viktimave ka kaluar mbi 1700 të vdekur, ndërsa mijëra persona të tjerë janë plagosur dhe qindra mijëra janë zhvendosur nga zonat e konfliktit.
Lufta nisi më 28 shkurt pas sulmeve ajrore të ndërmarra nga Shtetet e Bashkuara dhe Izraeli ndaj objektivave në Iran, operacione që çuan edhe në vrasjen e liderit suprem iranian, Ali Khamenei. Pas kësaj, Irani reagoi me sulme raketore dhe dronë ndaj Izraelit dhe bazave ushtarake amerikane në disa vende të rajonit.
Sipas të dhënave të raportuara nga mediat ndërkombëtare dhe autoritetet lokale, vetëm në Iran janë regjistruar mbi 1200 viktima, ndërsa dhjetëra të tjerë janë vrarë në Izrael dhe Liban si pasojë e sulmeve dhe kundërsulmeve të vazhdueshme. Konflikti është zgjeruar edhe në Liban, ku përplasjet mes Izraelit dhe Hezbollahut kanë shkaktuar qindra viktima dhe zhvendosjen e qindra mijëra civilëve.
Ndërkohë, tensionet kanë përfshirë disa shtete të tjera të rajonit, pasi Irani ka goditur objekte ushtarake dhe baza të lidhura me SHBA-në në vende të Gjirit Persik. Komuniteti ndërkombëtar ka bërë thirrje për ulje të tensioneve dhe ndalimin e përshkallëzimit të mëtejshëm të konfliktit, ndërsa situata mbetet e paqëndrueshme dhe me rrezik për zgjerim të mëtejshëm të luftës.
