Gjithnjë e më shumë përdorues po zgjedhin të shkëputen përkohësisht nga platformat e mediave sociale si Instagram, TikTok dhe Snapchat, në një përpjekje për të rikthyer fokusin dhe balancën në jetën e përditshme.
Sipas anketave të fundit, një numër në rritje përdoruesish thonë se ndihen të mbingarkuar nga njoftimet e vazhdueshme dhe ritmi i shpejtë i përmbajtjes online. Shumë prej tyre pranojnë se rrjetet sociale nuk përdoren më vetëm për të komunikuar me miqtë, por shpesh hapen në mënyrë automatike, thjesht për të kaluar kohën.
Të dhënat e kompanisë së analizave dixhitale GWI tregojnë se përdorimi “refleksiv” i aplikacioneve është bërë gjithnjë e më i zakonshëm, ndërsa lidhja e tyre me komunikimin aktiv mes miqve ka rënë krahasuar me vitet e mëparshme.
Një tjetër studim i Deloitte UK për vitin 2025, me rreth 4,150 pjesëmarrës, tregon se pothuajse një e katërta e përdoruesve të mediave sociale kanë fshirë të paktën një aplikacion brenda 12 muajve të fundit. Tek Gjenerata Z, kjo shifër shkon deri në rreth një të tretën.
Ekspertët e shëndetit mendor theksojnë se efektet e “detoksit dixhital” nuk janë njësoj për të gjithë. Dr. John Torous, profesor i asociuar i psikiatrisë në Shkollën Mjekësore të Harvardit dhe drejtor i psikiatrisë dixhitale në Qendrën Mjekësore Beth Israel Deaconess, thotë se ndërprerjet e përkohshme mund të sjellin përmirësime në mirëqenie për disa përdorues.
Sipas një studimi të vogël të bashkëdrejtuar prej tij, ku të rinj të moshës 18–24 vjeç bënë një pushim njëjavor nga rrjetet sociale, u vunë re përmirësime në nivelet e ankthit, depresionit dhe pagjumësisë.
Megjithatë, studiuesit nënvizojnë se ndikimi i rrjeteve sociale varet nga mënyra e përdorimit dhe se efektet e shkëputjes nuk janë domosdoshmërisht të njëjta për të gjithë përdoruesit.
