Partia Demokratike ka mbajtur pasditen e kësaj të premte (8 maj 2026) protestën e 8 kombëtare, kundër Edi Ramës, pas skandaleve që përfshinë qeverinë e këtij të fundit.
Protesta nisi si marshim paqësor, por nuk u çua deri në fund, pasi u bllokua nga forcat e Policisë.
Fillimisht protestuesit u mblodhën para godinës së Kryeministrisë, ku në një podium të sajuar, mbajtën fjalimet e tyre.
Pas fjalimeve, protestuesit dhe përfaqësues të Partisë Demokratike, u nisën drejt Ministrisë së Brendshme, në një marshim paqësor. Por forca të shumta policie u kanë zënë pritë duke bërë kordon në mes të bulevardit dhe duke u bllokuar lëvizjen.
Protestuesit insistuan që policia të hapte rrugën, por këta të fundit kanë hedhur gaz lotsjellës dhe breshëri uji për ti shpërndarë.
Në kundërpërgjigje protestuesit, kanë hedhur fishekzjarrë dhe molotovë, ndërsa nga shpërthimet e tyre nuk u raportua për të lënduar.
Kryedemokrati, Sali Berisha është bërë disa herë shënjestër i autobotit, i cili ka lëshuar breshëri uji drejt tij, ndërsa disa demokratë i kanë ardhur në ndihmë duke e mbuluar me çadra.
Në një prononcim për mediat, Berisha u shpreh se ishin duke bërë një marshim paqësor pa asnjë shenjë dhune dhe ndërhyrja e policisë ishte sipas tij një krim i shëmtuar. Berisha shtoi më tej, se do marrin përgjigjen e merituar.
“Do marrin përgjigjen e merituar. Ishin në marshim paqësor. U bllokua rruga. Këta do të marrin përgjigjen e merituar. Kanë kryer një krim të shëmtuar sot. Ne po bënim marshim paqësor”, u shpreh Berisha.
Kreu i Grupit Parlamentar, Gazmend Bardhi, në një prononcim për mediat, është shprehur se policia nuk ka të drejtë të bllokojë një protestë paqësore, ndërsa ka akuzuar se efektivët po provokojnë tubimin.
Sipas tij, policia ishte urdhëruar të ushtronte dhunë ndaj protestuesve.
“Në cilin vend të botës pengohet protesta? Nga kush i merrni urdhrat ju? A ishte protesta paqësore? Pse e provokoni protestën? A keni ligj ju apo zbatoni vetëm urdhra të paligjshëm?”, u shpreh Bardhi.
Po ashtu edhe sekretari i Përgjithshëm i PD-së, Flamur Noka, u shpreh se marshimi i tyre është i ligjshëm dhe i garantuar nga e drejta kushtetuese e protestës. Ai akuzoi urdhëruesit e ndërhyrjes policore, duke thënë se efektivët e thjeshtë janë “viktima të pushtetit”.
Noka u bëri thirrje policëve që të mos zbatojnë urdhra politikë dhe të bashkohen me qytetarët. Ai theksoi gjithashtu se protesta do të vazhdojë dhe se opozita nuk do të ndalet.
“Marshimi ynë është i ligjshëm. E drejta e protestës është e drejtë kushtetuese. Në paligjshmëri janë urdhërdhënësit e këtyre. Këta policët e thjeshtë janë viktima të bandës së pushtetit. Asgjë s’e ndal dot marshimin tonë. Asgjë.
Ne i bëjmë thirrje policëve të bashkohen me qytetarët sepse këto janë, këta janë po aq të vjedhur sa ç’ janë çdo çdo qytetar shqiptar. Këta janë të vjedhur nga Milinda, nga Belinda. Këta, këta luftojnë dhe punojnë për bukën e gojës, ndërkohë Milinda vjedh miliona euro. Dhe ajo rri në shtëpi, këta rrinë në përballje me motrat dhe vëllezërit e tyre. Ndaj unë po i bëj thirrje, ta hapin rrugën, mos t’i shërbejnë Skënder Ballukut… por t’i shërbejnë ligjit.
Pa diskutim, marshimi në bulevard… marshimi është i pandalshëm…– u shpreh Noka.
Ndërkohë pas përplasjes me policinë, të cilët nuk u lejuan marshimin, protestuesit u drejtuan drejt selisë së Partisë Demokratike, dhe kështu u mbyll protesta e 8 kombëtare e thirrur nga Berisha.
I pyetur nga selia blu për protestën e radhës, Berisha u shpreh se nuk ka ende një përgjigje.
Pyetje: Protesta e radhës para apo pas rizgjedhjes tuaj në 23 maj?
Berisha: Nuk kam një përgjigje, por protesta do të jetë e fuqishme. Edhe nëse bëhet para nuk ka asnjë lidhje. Çdo protestë e jona ka lidhje me një regjim antishqiptar, armik të qytetarëve shqiptarë.
Në përfundim të protestës, policia njoftoi se ka shoqëruar 3 protestues, me pretendimin se kanë ushtruar veprime të dhunshme në protestë, ndërsa njoftoi se 3 efektivë policie kanë mbetur të lënduar dhe kanë përfunduar te Trauma.
