Demokratët kanë fituar kontrollin e Senatit dhe të Dhomës së Përfaqësuesve duke marrë kështu drejtimin e Kongresit amerikan për dy vitet e mbetura të mandatit të të presidentit Donald Trump. Demokratët siguruan 54 vende në Senat dhe të paktën 220 në Dhomën e Përfaqësuesve.
Fitorja e demokratëve u shtri edhe në bastionet tradicionale republikane. Në garën për Senatin ata fituan vende në Teksas, Ohajo, Kansas dhe Karolinën e Veriut.
Një tjetër moment historik i këtyre zgjedhjeve ishte fitorja e demokratit Abdul El-Sayed në Michigan, i cili u bë myslimani i parë i zgjedhur në Senatin amerikan, pasi mundi rivalin republikan Mike Rogers.
Rezultati shënon një ndryshim të rëndësishëm të hartës politike amerikane, duke i dhënë fund kontrollit republikan mbi të dyja dhomat e Kongresit.
Vetë presidenbti Donald Trump reagoi duke pranuar se demokratët kishin zhvilluar një fushatë të mire.
“Mesazhi im është urime për demokratët dhe mezi pres të punoj me ju për të mirën e vendit tone. Mendoj se do të duan të punojnë me mua, Përndryshe unë thjesht do të vija veton për gjithçka, dhe ata nuk do ta duan këtë. Unë kam fuqinë përfundimtare. Quhet veto.”
Trump pranoi fitoren e demokratëve, por tregoi edhe arsyen që sipas tij ndikoi në votë.
“Mendoj se një pjesë e kësaj ishte Irani, por në të njëjtën kohë, njerëzit e kuptuan rëndësinë e asaj që kam bërë me Iranin.”
Marrja e kontrollit të Kongresit u jep demokratëve mundësinë të kufizojnë ndjeshëm hapësirën e veprimit të presidentit Trump gjatë dy viteve të mbetura të mandatit. Ata mund të pengojnë miratimin e ligjeve të mbështetura nga Shtëpia e Bardhë, të kundërshtojnë projektbuxhetin dhe të nisin hetime parlamentare për vendimet dhe veprimtarinë e administratës.
Kontrolli i Senatit ka gjithashtu rëndësi të veçantë, pasi ai ka kompetencën të miratojë emërimet e rëndësishme presidenciale, përfshirë gjyqtarët federalë dhe zyrtarët e lartë të administratës.
