Partizani ende nuk ka hyrë zyrtarisht në merkato, por piketat e para të janarit i ka hedhur dhe një listë me emra në tavolinën e Shehit dhe Abilaliajt, me siguri është bërë.
Pavarësisht se në skuadër janë shumë sulmues, është evidente se ekipi i kuq nuk e ka “vrasësin serial” para portës, atë lojtarin që të bën gol me gjysmërasti. E për ta gjetur këtë lloj futbollisti ka nisur puna prej kohësh. Dëshirat më të mëdha janë emra, që e kanë treguar veten më parë në kampionatin tonë. Një emër i papërmendur më parë mësohet se është Redon Xhixha.
Ish-sulmuesi i Tiranës aktualisht është pjesë e Karabakut, ku nuk ka arritur të luajë rregullisht dhe azerët po mendojnë edhe versionin e huazimit në këtë merkato janari. Për laçianin flitet se është interesuar Tirana, por mediat azere raportojnë se Partizani është klubi më i interesuar për huazimin e 25- vjeçarit.
Ardhja e Orges Shehit në kampin e kuq me siguri ka ndikuar në përfshirjen e Xhixhës në listën e dëshirave dhe drejtuesit do të kërkojnë t’ia plotësojnë dëshirën. Trajneri durrsak dhe sulmuesi së bashku kanë fituar titullin kampion para dy vitesh.
Në atë edicion Xhixha regjistronte sezonin më pozitiv në karrierë, duke shënuar 14 gola dhe dhuruar plot 6 asiste në një bashkëpunim spektakolar me Taulant Seferin. Te Karabaku, Xhixha ka luajtur më së shumti si zëvendësues. Ai numëron 38 zbritje në fushë në mbi 1500 minuta, duke shënuar 7 gola dhe dhuruar 4 asiste. Mbetet për tu parë e ardhmja e laçjanit, për të cilin nuk përjashtohet mundësia që të ketë oferta edhe nga klube të tjera jashtë vendit. Njohja me Shehin mund të jetë një shtysë për realizimin e këtij transferimi.
