Në fund të vitit të kaluar ishte bërë publik lajmi për ardhjen, në fillim të vitit 2026, të bisedave erotike në ChatGPT, pra mundësinë për të pasur përmbajtje dhe diskutime me natyrë seksuale me inteligjencën artificiale, të rezervuara për përdorues madhorë dhe të verifikuar. Megjithatë, ditët e fundit është vendosur të ndalohet realizimi i këtij projekti.
Arsyet janë të ndryshme, që nga ato etike deri te vështirësitë praktike dhe teknike.
Që prej lançimit të ChatGPT, përdorimi i tij është rritur në mënyrë eksponenciale, duke u kthyer brenda pak muajsh në platformën më të përdorur të inteligjencës artificiale, me opsione abonimi për funksione shtesë. Paralelisht me përhapjen e tij, janë shtuar edhe debatet mbi etikën, mënyrat e përdorimit dhe sigurinë e AI.
Këto debate u intensifikuan edhe më shumë kur, gjatë eventit DevDay 2025 në tetor, drejtori ekzekutiv Sam Altman njoftoi mundësinë e një versioni për të rritur të ChatGPT. Ideja ishte krijimi i një seksioni ku përdoruesit madhorë të mund të diskutonin tema si seksi dhe erotizmi, me më pak kufizime se aktualisht.
Plani parashikonte edhe një sistem të ri verifikimi moshe, për të garantuar që vetëm përdoruesit e rritur dhe të identifikuar të kishin akses në këto përmbajtje. Sipas Altman, kjo do t’u jepte më shumë liri përdoruesve për të zgjedhur si ta përdorin AI.
Por pyetja kryesore mbetet: a janë të sigurta këto biseda? Që nga momenti i njoftimit, projekti ka ngritur shumë pikëpyetje, si nga publiku ashtu edhe nga vetë brenda kompanisë. Disa e shohin si zgjerim të mundësive për përdoruesit e rritur, të tjerë si një rrezik serioz, sidomos për të rinjtë.
Edhe pse janë propozuar mjete kontrolli prindëror, që lejojnë monitorimin dhe kufizimin e përdorimit nga të miturit, shqetësimet për sigurinë mbeten. Prindërit dhe ekspertët janë skeptikë jo vetëm për këtë funksion, por për ndikimin e përgjithshëm të platformës.
Sipas raportimeve të Financial Times, OpenAI ka vendosur të pezullojë projektin për një kohë të pacaktuar, derisa të krijohen kushtet e duhura. Një nga arsyet kryesore lidhet me aspektin etik: investitorë dhe punonjës kanë shprehur shqetësime për ndikimin social të një AI që gjeneron përmbajtje seksuale pa kontroll të plotë.
Ekziston gjithashtu frika se këto biseda mund të nxisin varësi emocionale ndaj AI dhe të krijojnë marrëdhënie të paqarta me teknologjinë. Deri më tani mungojnë studime të qarta për efektet afatgjata dhe rreziqet e mundshme.
Përveç kësaj, ka edhe sfida teknike. Sistemet aktuale janë ndërtuar pikërisht për të filtruar përmbajtje të tilla dhe përshtatja e tyre për t’i lejuar vetëm për një grup përdoruesish rezulton shumë komplekse. Testimet kanë treguar se filtrimi i përgjigjeve në mënyrë të sigurt dhe të besueshme mbetet i vështirë.
Një tjetër problem i madh është verifikimi i moshës.
Në përfundim, shumë rreziqe dhe pak garanci sigurie kanë çuar në pezullimin e projektit. Dhe ndoshta pyetja më e thjeshtë mbetet: a ishte vërtet e nevojshme një gjë e tillë, në një kohë kur përmbajtjet seksuale janë tashmë lehtësisht të aksesueshme, madje edhe për të miturit?
