Një shqiptare, nënë e tre fëmijëve, përfshirë një foshnjë të porsalindur, është bërë gruaja e parë që ekstradohet nga Britania e Madhe drejt Shqipërisë për të vuajtur një dënim me burg.
Lirie Delishi, 25 vjeç, u urdhërua të ekstradohej pasi gjykatësi John Zani vendosi se interesi publik për të shmangur perceptimin e Britanisë si “strehë e sigurt për kriminelët” ishte më i rëndësishëm sesa pretendimet e saj për shkelje të të drejtës për jetë familjare, sipas Konventës Evropiane për të Drejtat e Njeriut (KEDNJ).
Autoritetet shqiptare kishin kërkuar ekstradimin e saj për të vuajtur një dënim me katër muaj burg, pasi në vitin 2019 Delishi ishte kapur në aeroportin e Tiranës me një pasaportë të falsifikuar rumune, ndërsa tentonte të udhëtonte drejt Romës.
Gjatë seancës në Gjykatën e Magjistratëve të Westminster, Delishi, atëkohë shtatzënë me fëmijën e tretë, apeloi vendimin, duke argumentuar se ndarja nga fëmijët dhe partneri do të ishte “e tmerrshme”. Ajo tha se bashkëshorti i saj, Edmond, mund të detyrohej të mbyllte njërin prej bizneseve të tij në Britani për t’u kujdesur për fëmijët.
“Do të jetë shumë e vështirë të jem pa ta në muajt e parë të jetës së foshnjës. Mundohem të mos mendoj për ekstradimin për shkak të ndikimit që do të ketë te familja ime. Familja ime është shumë e turpëruar për këtë rast pasi nuk jam nga lloji i familjes që futet në telashe. Përpara kësaj vepre penale nuk kisha dënime në Shqipëri ose në Mbretërinë e Bashkuar”, ka deklaruar ajo, por gjyqtari ka vendosur me “dorë të hekurt”.
Aktualisht, ajo ndodhet ende në Britani në pritje të një apeli ndaj vendimit, por nëse ai refuzohet, Delishi do ta vuajë dënimin në burgun e Pojskës, i cili është i vetmi institucion për gra në Shqipëri, me kapacitet për rreth 110 të dënuara.
Delishi ka përfunduar studimet për inxhinieri kompjuterike në Shqipëri në vitin 2019, përpara se të zhvendosej në Britani për t’u bashkuar me partnerin e saj, me të cilin jeton prej gjashtë vitesh.
