Deputetja e Shkodrës, Marjana Koçeku ka reaguar sërish publikisht pasi njoftoi largimin nga PS dhe kalimin si deputete e pavarur.
Ajo u sulmua menjëherë nga disa socialistë, duke i kërkuar të braktisë mandatin e deputetes, por sot përmes rrjeteve sociale, Koçeku sfidon hapur maxhorancën për zgjedhje të parakohshme, duke kërkuar matjen e forcave reale në votë dhe duke deklaruar se nuk do të tërhiqet nga përballja politike.
Në reagimin e saj, teksa përdor edhe gjuhën e saj gegë, ajo madje ka paralajmëruar se do të hyjë në garë në Tiranë.
“Nuk ua kam marrë mandatin e deputetit. Ma keni marrë ju mue, për 10 muej rresht. Tash mandati ka ardhë në vend të vet. Nëse jeni kaq të sigurt që unë nuk fitoj pa ju dhe ju i keni plot 83 mandate, atëherë shpërndajeni parlamentin, shkojmë në zgjedhje të parakohshme dhe masim forcat se kush fiton çka. Kësaj radhe do marr me vete kecin tim të shtrenjtë, bashkë me kmesën e mprehtë, dhe do zbres me kandidue në Tiranë. Para se të vij, ndoshta iu marr leje malësorëve të mi me e folë gjuhën standarde“, shkruan deputetja shkodrane e njihur edhe si “neomalësorja”.
