Supermarketet që operojnë në vendin tonë shpesh janë vënë në qendër të kritikave nga qytetarët për abuzime me produktet, ku në disa raste janë raportuar data skadencash të falsifikuara, cmime te larta apo produkte të prishura.
Rasti është denoncuar publikisht nga gazetari Mentor Kikia, i cili thotë se shpesh ka konstatuar mospërputhje midis çmimeve të shënuara në raft dhe atyre që dalin në faturë pasi produktet kalojnë në kasë.
Sipas tij, kjo praktikë ka për qëllim të mashtrojë konsumatorët dhe ndodh kryesisht në BIG Market.
“E kam hasur dhe investiguar vetë. Shënojnë një çmim në raft dhe tjetër del në faturë. Ti joshesh nga çmimet e ulëta, mbush karrocën dhe në fund paguan shumë më tepër. Ata janë mashtrues!”, ka shkruar Kikia.
Ai u bën thirrje qytetarëve të jenë të kujdesshëm gjatë blerjeve, të kontrollojnë me vëmendje çmimet dhe datat e skadencës, ndërsa i kërkon institucioneve përgjegjëse të mos qëndrojnë në heshtje përballë këtyre abuzimeve.
“Jini vigjilentë, verifikoni faturat. Kur shteti dhe hajduti bëhen një, masat duhet t’i marrësh vetë,” ka theksuar gazetari.
A ju ka ndodhur edhe juve të përballeni me situata të ngjashme?
