Sali Berisha ka reaguar me tone të ashpra ndaj fjalës që mbajti kryeministri Edi Rama në podcast-in e tij “Flasim”.
Pasi uroi qytetarët për festën e Pashkës, Berisha u ndal menjëherë te çmimi i naftës, duke pohuar se qeveria shqiptare aplikon taksën më të lartë në botë, e cila kap vlerën e 60% të çmimit final ose 1.1 euro për çdo litër.
“Së pari, të dashur qytetarë dhe qytetare, ju uroj dhe njëherë nga zemra gëzuar Pashkën, Pashkën tjetër më mirë ta festojmë. Së dyti, jam sot para jush sepse nuk ngurroi as ditën e Pashkës të ligjërojë monologun e tij të mashtrimit. Edi Rama sot u rrek përsëri të mashtrojë shqiptarët lidhur me çmimin stratosferik të naftës. E vërteta dhe njëherë ta dini të dashur qytetarë, se kjo qeveri ka vendosur mbi naftën, taksën absolutisht më të lartë në botë. Kjo qeveri takson si asnjë qeveri tjetër e planetit, 60% të çmimit me të cilin shitet nafta në treg dhe merr në çdo litër naftë 1.1 euro.
Lëvizja që pretendon me akcizën, është një tallje. Sipas tij, ajo hyn në fuqi kur nafta tejkalon 220 Iekë për litër, ndërkohë që përgjysmimi i barrës fiskale, i taksave mbi naftën, do të ishte rruga e vetme për të ulur çmimin e saj dhe për ta mbajtur atë në nivele të përballueshme nga qytetarët shqiptarë, nga fermerët shqiptarë, për ta mbajtur atë në nivele të kontrollueshme edhe për çmimet e tjera.”
Sipas liderit të opozitës, rruga e vetme për të ndihmuar qytetarët dhe fermerët është përgjysmimi i barrës fiskale, ndërsa lëvizjet e fundit të qeverisë me akcizën i cilësoi si një tallje që hyn në fuqi vetëm kur çmimet kalojnë nivelet e papërballueshme.
“Së dyti, përsëri, ai fajësoi për bllokimin e raportit të IBAR, de facto të negociatave me Bashkimin Europian, për shkak të çështjes Balluku dhe AKSHI, ku autor kryesor është Edi Rama, që përdori 83 mandatet e krimit për të mbrojtur veten nga dosja Balluku.
Së pari u përpoq të fajësojë opozitën. Së dyti, hodhi poshtë, mashtroi, se ka një bllokim apo ka një mosvotim të raportit të IBAR. E vërteta është kjo të dashur qytetarë: Opozita nuk është shkaku i bllokimit të votimit të raportit IBAR. Shkaku i vërtetë është vota me 83 mandate krimi, mburojë e korrupsionit të Edi Ramës, Lub Ballukut dhe rrethit të tij familjar dhe zyrtar.“
Më tej, Berisha u fokusua te çështja e integrimit në Bashkimin Europian, duke hedhur poshtë pretendimet e kryeministrit se opozita po bëhet pengesë për votimin e raportit IBAR. Ai theksoi se bllokimi vjen si pasojë e korrupsionit qeveritar dhe përdorimit të mandateve parlamentare si mburojë për zyrtarët e lartë, duke shtuar se numri i vendeve anëtare të BE-së që kundërshtojnë progresin e Shqipërisë është rritur ndjeshëm brenda pak javësh. Berisha akuzoi Ramën se po zëvendëson agjendën evropiane me afrimin ndaj Beogradit, duke e cilësuar këtë si një tradhti ndaj interesave kombëtare.
“Dhe unë ju garantoj, se ky bllokim do bëhet gjithnjë e më i fortë. Mos harrojmë se para 3 javësh ishin 4 vende, ato të cilat bllokuan votimin e raportit IBAR. Me datën 1 prill, nuk ishin më 4 vende, por ishin 9 vende, një pjesë e mirë e të cilave janë pro zgjerimit të Bashkimit Europian. Pra, edhe njëherë, me Edi Ramën, integrim nuk ka. Edi Rama është një armik i egër, i cili, po zëvendëson integrimin e vërtetë në Bashkimin Europian, me integrimin e tij me Beogradin. Po zëvendëson pasaportën evropiane, me pasaportën e Serbisë.“
