Bashkimi Evropian kërkoi trajtimin me urgjencë të kërkesës së SPAK për heqjen e imunitetit të Belinda Ballukut. Mirëpo, mazhoranca nuk e sheh çështjen aq emergjente sa unioni.
I pyetur për qëndrimin e BE-së, Taulant Balla deklaroi për mediat pa u shqetësuar se çështja do të jetë në shqyrtim seancën e radhës.
“Unë këtë çështje e sqarova, mos u shqetësoni, është në përputhje të plotë, në seancën e radhës për shkak të afateve çështja do jetë në shqyrtim”, tha Balla.
Parlamenti Evropian e ka cilësuar çështjen ‘Balluku’, një test kritik për Shqipërinë në luftën ndaj korrupsionit. Eurodeputeti Andrey Kovatchev deklaroi se hetimet e nisura nga SPAK duhet të vazhdojnë të pacënuara dhe pa asnjë ndërhyrje politike.
“Hetimet që janë në vijim, përfshirë atë të Zv. Kryeministres duhet të vazhdojnë pa asnjë ndërhyrje. Zbatimi i ligjit nuk mund të jetë selektiv. Shqyrtimi i kërkesës për heqjen e imuniteti pa asnjë vonesë është përgjegjësi e parlamentit”, theksoi Kovatchev.
