Kreu i Grupit Parlamentar të PD-së, Gazment Bardhi kërkoi me urgjencë prezencën e kryeministrit Edi Rama në Kuvend për të dhënë shpjegime gjatë seancës plenare në lidhje me deklaratën që dha dje zyra e shtypit të Qeverisë, duke i cilësuar “Hamendësime” njoftimin e Ambasadës së SHBA-ve në lidhje me rreziqet e kërcënimet e Iranit në Shqipëri.
Ai e cilësoi skandaloz reagimin e qeverisë në lidhje me këtë çështje, teksa tha se Edi Rama u tha dje shqiptarëve që të mos i besonin partnerëve tanë kryesorë, SHBA-ve. Sipas Bardhit, çështjet e sigurisë kombëtare nuk janë “as muhabet kafenesh dhe as Twiteri”.
“Çështjet e sigurisë nuk janë kafene zoti kryetar, nuk bëhen në publik, se thatë mos t’i bëjmë në publik ndërkohë që jemi në seancë plenare. Mos ndërhyni ju lutem. Nuk janë çështje Twiteri, burime qeverish apo kafenesh, por janë të rëndësishme. Sigurisht për të mos u përdorur për politikë dhe për të mos shqetësuar qytetarët shqiptarë, ju themi se në si opozitë nuk kemi asnjë informacion për shqetësimin që shfaqi ambasada e SHBA në Shqipëri, por qëndrimi i qeverisë ishte skandaloz. Por një qeveri që nuk kontrollon dot me radarë miliona litra naftë kontrabandë dhe s’kap një gramë kokainë, apo që nuk pa mijëra hektarë tokë të mbjella me kanabis në Shqipëri, nuk mund të jetë e besueshme”, tha ai.
Më tej akuzoi kryeministrin se po përpiqet të diskreditojë SHBA-të dhe partnerët ndërkombëtarë, teksa vetë është i pabesueshëm në qeverisjen e vendit. Bardhi kërkoi prezencën urgjente të kryeministrit në sallë.
“Përpjekja për të diskredituar ambasadën e SHBA është hamendësim dhe me e keqa qeveria nuk ka bashkëpunim me partnerin tonë kryesor. Ndaj mesazhi politik që dha kryeministri dje nëpërmjet zyrës së shtypit është se shqiptarët nuk duhet të besojnë SHBA-të për njoftimet dhe reagimet dhe nuk duhet t’i kushtojnë rëndësi njoftimeve të tyre. Ndaj zoti kryetar në mbështetje të Rregullores kërkojmë të paraqitet kryeministri dhe të japë shpjegime për 3 çështje kryesore. Pse e cilësoi hamendësim njoftimin e ambasadës së SHBA për rrezikun dhe kërcënimet. A ka koordinim me ndërkombëtarët për çështjen dhe çfarë informacione ka shkëmbyer. A ka një vlerësim zyrtar lidhur me çështjen e Iranit, masat që janë marrë dhe cilat janë ato masa”.
Në fund ai apeloi që ministrat dhe kreu i qeverisë të ishin në seancën plenare prezent dhe të shpjegonin para qytetarëve situatën.
“Kryeministri dhe ministrat e kanë për detyrë të marrin pjesë në seancë plenare kur kërkohet nga deputetët dhe unë kërkoj që ai të vijë në parlament dhe të japë shpjegime mbi këto”, përfundoi Bardhi.
