Prokuroria e Posaçme Kundër Korrupsionit dhe Krimit të Organizuar (SPAK), në bashkëpunim me Byronë Kombëtare të Hetimit (BKH), kanë intensifikuar hetimet në kuadër të dosjes “Aruba”, që lidhet me një grup të dyshuar për trafik ndërkombëtar droge dhe pastrim parash përmes investimeve në Shqipëri.
Në kuadër të këtij hetimi, me autorizim të Gjykatës, hetuesit kanë ushtruar kontrolle në ambientet e Këshillit Kombëtar të Territorit (KKT), ku janë sekuestruar dhjetëra dosje që lidhen me kompani të përfshira në hetim. Burime bëjnë me dije se dokumentacioni i sekuestruar përfshin praktika për leje ndërtimi të kullave, resorteve turistike dhe projekteve të shpallura si investime strategjike.
Sipas hetimeve të SPAK, grupi kriminal, pjesë e të cilit dyshohet se janë biznesmeni Artur Shehu, Artur alias Luçiano Koçeku, Alfredo Hamzai, Ilir Shtufi, Orest Sota dhe Orgest Birçaj, dyshohet se ka investuar të ardhurat e përfituara nga aktiviteti kriminal në sektorin e ndërtimit, turizmit dhe biznese të tjera, me qëllim pastrimin e parave.
Sipas Weblajm, dosjet e sekuestruara lidhen me projekte ndërtimi në disa prej zonave më të kërkuara të vendit, si Palasa, Gjiri i Lalzit, Vlora, Tirana dhe zona të tjera të bregdetit shqiptar.
Çështja Aruba
Gjatë muajit Qershor, SPAK lëshoi masa sigurie për një sërë biznesmenësh, që dyshohet se pastronin paratë e trafikut të drogës nga Amerika Latine, përmes ndërtimeve në Shqipëri. Goditja u krye pas informacioneve të marra nga disa vende evropiane, kryesisht Anglia, Spanja apo Belgjika.
SPAK goditi grupet kriminale të drejtuara nga Luçiano Koçeku dhe Alfredo Hamzai, që mbytën kontinentin me kokainë ndërsa miliardat i pastronin në Shqipëri në bashkëpunim me Shehun, Shtufi, Birçajn apo Sotën.
Në vendimin voluminoz, të Gjykatës sës Posaçme, dosja niste me takimet e dokumentuara të bosëve të drogës në vende si Antverp Belgjikë, Majorka Spanjë apo edhe në më të famshmin prej të gjithevë, ‘samiti’ në ishullin e Arubas në antilet holandeze.
Në takimet, të cilat janë zhvilluar në vitet 2018-2021, kryesisht sipas SPAK është biseduar në kuadër të veprimtarisë kriminale të trafikimit të narkotikëve, por edhe për investime në Shqipëri.
Sa i takon samitit të Arubës, ka pasur vazhdimishr akuza për përfshirjen e zyrtarëve të lartë të qeverisë. Sali Berisha, kreu i PD, ka konfirmuar qëndrimin e tij, se në këtë samit kanë qenë Engjëll Agaçi, asokohe numri dy i kryeministrisë, Damian Gjiknuri dhe Ergys Agasi, aktualisht i shpallur në kërkim për dosjen e AKSHI-t.
