Ardit Demiri, drejtori i Përgjithshëm i Postës Shqiptare, ka finalizuar ditët e fundit tenderin për internet, nën dyshime të forta se gjithçka ka qenë e paracaktuar në favor të ish-deputetit Koço Kokëdhima. Sipas dokumenteve që disponon VoxNews, për të shkuar te oferta e Kokëdhimës, Arditi i Postës ka skualifikuar dy firmat që ofruan më pak.
Ky është një tjetër tender i dyshimtë i Drejtorisë së Përgjithshme të Postës, teksa edhe më parë i njëjti institucion është lakuar për shumë probleme me dhënien e tenderëve. Madje, janë shkarkuar disa drejtorë, nën dyshimet e forta se bënin punët dhe më pas, firma që i bëri punimet, shpallej edhe fituese.
Por, ka pasur abuzime edhe me punësimin apo me marrëveshjet e fshehta me postat private, të cilat në mungesë të konkurrencës së asaj shtetërores, përfitonin kontrata të majme.
Faksimile: Njoftimi i fituesit të tenderit për internetin, i shpallur nga Posta Shqiptare
Faksimile: Njoftimi i fituesit të tenderit për internetin, i shpallur nga Posta Shqiptare
Sipas dokumenteve që ka hulumtuar VoxNews, ditët e fundit Arditi ka shpallur fituesin e tenderit “blerje internet-intranet, marrëveshje kuadër me një operator ekonomik ku të gjitha kushtet janë të përcaktuara me afat për 4 vite”. Mësohet se fondi limit i procedurës ishte 119,990,720 lekë pa TVSH.
Në tender mori pjesë “One Albania” me një vlerë 71,995,200 lekë, “Albanian Fiber” me vlerë 119 milionë lekë, “MC NETWORKING” me vlerë 83 milionë. Ofertë bëri edhe “Vodafone Albania” për 119 milionë lekë.
Ndërkohë, oferta e firmës fituese “Abissnet” ishte 93 milionë lekë. Siç edhe rezulton nga dokumentet, “One Albania” dhe “MC NETWORKING” ofruan më pak, por më pas u s’kualifikuan.
Faksimile: Vendimi i Postës Shqiptare për të skualifikuar ofertat që ofruan më pak
Faksimile: Vendimi i Postës Shqiptare për të skualifikuar ofertat që ofruan më pak
Në të njëjtin dokument, Posta Shqiptare shkruan se oferta e firmës “One Albania” me ofertë 71 milionë lekë është skualifikuar, pasi nuk siguron dot mbrojtjen nga sulmet DDoS.
Faksimile: Vendimi i Postës Shqiptare për të skualifikuar ofertat që ofruan më pak
Faksimile: Vendimi i Postës Shqiptare për të skualifikuar ofertat që ofruan më pak
Edhe oferta e firmës “MC NETWORKING” me vlerë 83 milionë lekë është skualifikuar për shkak se nuk është i licensuar për shërbimet e rrjetit nëntokësor.
Por, edhe dy ofertat e tjera që ishin në garë dhe ofruan më shumë sesa fituesi, janë skualifikuar. Dyshimet janë se e gjithë procedura ka qenë e paracaktuar, pasi të skualifikosh 4 nga 5 firma në garë, do të thotë se ka një prapaskenë. Për të tepër që përfituesi është një ish-deputeti i Kuvendit të Shqipërisë./ Vox News
