Në një procedurë të dyshimtë dhe me shumë pikëpyetje mbi transparencën dhe integritetin e konkurrencës, kompania “Alko Impex Construction”, e lidhur direkt me ish-deputetin dhe sipërmarrësin kontrovers Arbët Abazi, është shpallur fituese e një tenderi publik me vlerë 329 milionë lekë pa TVSH për pastrimin e rrugëve në Bashkinë e Kavajës.
Bëhet fjalë për një procedurë të hapur prokurimi për shërbime pastrimi e fshirjeje, me referencë REF-47662-05-13-2025, ku sipas dokumenteve të siguruara nga Publik.al, “Alko Impex Construction” është shpallur fituese me një ofertë afërsisht identike me fondin limit, duke lënë pas dy konkurrentë të tjerë: Fusha shpk dhe Rej shpk.
Fitorja me çmim të ngjashëm me fondin limit
Nga dokumentet zyrtare rezulton se:
- Alko Impex Construction shpk: 329,167,492.87 lekë
- Fusha shpk: 330,067,101 lekë
- Rej shpk: 330,437,260.88 lekë
Dallimi mes ofertës fituese dhe atyre të tjera është thuajse simbolik, një praktikë e njohur në tenderat e paracaktuar, ku kompanitë “konkurrente” ofrojnë çmime të afërta për të simuluar garën, ndërsa fituesi është përcaktuar paraprakisht.
Pa nënpërmarrës dhe pa transparencë në përzgjedhje
Sipas formularëve të njoftimit, “Alko Impex” deklaron se nuk ka nënpërmarrës dhe as subjekt mbështetës, një tjetër element që ngre dyshime mbi kapacitetin real të kompanisë për të kryer një shërbim të tillë me përmasë të konsiderueshme dhe në një afat 60-mujor.
Gjithashtu, nga dokumentet mungon çdo justifikim përse “Alko Impex” u përzgjodh si “më e favorshmja ekonomikisht bazuar në çmim”, ndërkohë që diferenca mes operatorëve ishte minimale dhe nuk jepen kritere të tjera përzgjedhjeje si cilësia, eksperienca apo kapaciteti teknik.
Kush është Arbët Abazi?
Emri i Arbët Abazit është përmendur shpesh në skandale të lidhura me tendera publikë, ndërtime të dyshimta dhe ndikim të tepruar mbi administratën vendore. Pas largimit nga Kuvendi, Abazi duket se ka zhvendosur fokusin nga politika te biznesi dhe kapja e kontratave publike në nivel bashkie – sidomos aty ku kontrollon administratën përmes lidhjeve politike apo klienteliste.
Sipas burimeve nga vetë Bashkia e Kavajës, kompania “Alko Impex” ka fituar disa kontrata të tjera në vitet e fundit, ndërsa drejtuesit aktualë të bashkisë nuk kanë reaguar ndaj kritikave për mungesë transparence dhe klientelizëm në shpërndarjen e kontratave.
Një skemë që përsëritet
Ky rast është shembull i një modeli të kthyer në praktikë në shumë bashki në vend: krijimi i një gare të simuluar, shpallja e fituesit me ofertë të fryrë afër fondit limit dhe mungesa e transparencës përse eliminohen ofertat e tjera. Ndërkohë, publiku paguan për pastrime që shpesh nuk realizohen, ndërsa kompani me lidhje politike vazhdojnë të pasurohen përmes parasë publike./ Publik.al
