Teksa protesta qytetare vijon prej 13 ditësh në Tiranë, kryeministri Rama ka mohuar se organizimi i festës së 35-vjetorit të Partisë Socialiste në të njëjtën orë dhe pranë protestës përbën një provokim.
Pavarësisht kritikave se aktiviteti i PS-së po përdoret si kundërpërgjigje ndaj mobilizimit qytetar, Rama këmbënguli se bëhet fjalë vetëm për një festë të planifikuar prej muajsh.
Madje u justifikua me faktin se për shkak të temperaturave të larta, tubimi nuk mund të spostohej.
“Më vjen shumë keq por së pari kemi planifikuar të gjithë këto muaj, kohë më përpara se të shfaqej kjo protestë. 12 qershori është lindja e PS, nuk e spostonin dot ditëlindjen se ka protestë. Ora është e përshtatshme për faktin se nuk jemi më në temperaturat e mëparshëm dhe nuk mund tu kërkoj njerëzve të mblidhen në pikë të diellit. Ne do të mbarojmë shumë me shpejt. Nuk ka këtu as provokim, as përballje, kjo është jeta demokratike”, tha Rama për “Shqipëria Live” në Top Channel.
