Disa ditë më parë, Prokuroria e FIerit arrestoi 10 zyrtarë dhe ish-zyrtarë të kompanisë së naftës në Patoz-Marinzë, “Bankers Petroleum Albania”, mes të cilëve dhe CEO-n aktual, Hongping Xiao, dhe ish-drejtuesin, Leonidha Çobo.
Ndaj tyre janë ngritur akuzat për veprat penale: “Krijimi i skemave mashtruese lidhur me tatimin mbi vlerën e shtuar”, “Fshehja e të ardhurave”, “Pastrimi i produkteve të veprës penale ose veprimtarisë kriminale”, “Shpërdorimi i detyrës” dhe “Moskryerja e detyrave nga organet tatimore”.
Por, nga “Bankers Petroleum Albania” kanë përfituar edhe një sërë kompanish të tjera të biznesmenëve shqiptarë, mes të cilëve edhe kompania “AlbStar” e Idajet dhe Sadik Ismailajt, përmes kontratave për punët e kryera me nënkontraktorë.
Kontratat e Bankers me kompaninë shqiptare “AlbStar”, e cila ofron punime civile si rrugë etj., ishte më e debatueshmja. “AlbStar” nisi të punojë me Bankers fillimisht në vitin 2004 me një kontratë 15 mujore, e cila u zgjat në vijimësi.
Bankers u justifikua me faktin se nuk kishte arsye që të ndryshonte kompani për shkak se aktualja kishte eksperiencë. Por fakti që punimet civile nuk konsiderohen si punime specifike të naftës bëri që AKBN ta rrëzojë pretendimin me argumentimin se në Shqipëri ka 1,951 kompani ndërtimi dhe vetëm në qarkun e Fierit ka 111 kompani të tilla.
Faqja “Forumi për Mbrojtjen e Trashëgimisë Kulturore”, përmes një reagimi në rrjetet sociale, ka kërkuar që përveç “Bankers”, të hetohet nga SPAK dhe ndaj këtyre kompanive, sidomos ndaj “AlbStar” të Idajt dhe Sadik Ismailajt.
Në postim theksohet fakti i ndërtimit të “Resort Manastirit” nga kompania “AlbStar”, brenda zonës së Mbrojtur të Parkut të Butrintit. Këtë resort në plazhin e Manastirit, ministrja Mirela Kumbaro e konsideroi si një “pikë të voçkël”, por që betonizimi i kësaj zone po vjen gjithnjë duke u zgjeruar me leje të tjera të dhëna nga Edi Rama.
“Hetimi ndaj evazionit te “Bankers Petrolium” nxjerr ne drite dhe perfshirjen e kompanise qe po nderton pikezen e vockel te Kumbaros ne zonen e mbrojtur te parkut te Butrintit. A duhet te kete nje hetim nga SPAK per te ndalur favorizimin e evazoreve dhe bashkepunetoreve te tyre ne dem te publikes” – shkruhet në postim.
