Të shtëna me armë janë raportuar në universitetin e Pragës. Sipas informacioneve të deritanishme, raportohet për viktima dhe të plagosur.
Policia ka rrethuar zonën përreth institucionit arsimor.
“Në bazë të informacionit fillestar mund të konfirmojmë se ka të vdekur dhe të plagosur në vendngjarje”, tha policia e Pragës në Twitter.
Policia ka thënë se e ka vrarë autorin dhe e gjithë ndërtesa është duke u evakuuar.
Sipas një profesori që jep mësim në universitet, studentët dhe stafi morën një email të enjten pasdite për të qëndruar në një vend të sigurt brenda institucionit. “Jemi fortifikuar në katin e dytë, të shtënat po ndodhnin në katin e katërt”, tha ai për mediat lokale, duke shtuar se janë dëgjuar një numër i madh të shtënash.
Punonjësit e Shkollës së Arteve, e cila gjithashtu ndodhet në të njëjtën rrugë me Universitetin Charles, morën një email të ngjashëm. “Qëndro aty ku je, mos shko askund. Nëse jeni në zyra, mbyllni ato dhe vendosni mobiliet para dyerve. Fikni dritat, autori ka të ngjarë në katin e katërt të pallatit në sheshin Jan Palach”, thuhet në email.
