Sokol Mjacaj, i dënuar me burgim të përjetshëm për vrasjen e dy turistëve çekë, ngjarje e ndodhur rreth 10 vjet më parë, është kthyer sërisht në protagonist, këtë rradhë duke ekzekutuar brenda burgut të sigurisë së lartë në Peqin, Arben Lleshin. Ky i fundit, i dënuar me burgim të përjetshëm, u qëllua me armë zjarri, teksa ndodhej në qelinë e tij në katin e parë, bashkë me një tjetër të dënuar, Indrit Shaqjan.
Mjacaj ka qëlluar ndaj Lleshit, ndërsa si pasojë e të shtënave ka mbetur i plagosur edhe Indrit Shaqja, edhe ky i dënuar me burgim të përjetshëm. Shaqja, sipas raportimeve, ka tentuar të ndalojë Mjacajn që të qëllojë me armë, por një nga plumbat e ka kapur në këmbë.
Por pas verifikimeve dhe hetimeve ka rezultuar se Xhakja as ishte plagosur as ndodhej në ambientin e qelisë ku ndodhej viktima.
Ngjarja e rëndë në burgun e Peqinit është raportuar me informacione kontradiktore, kjo edhe për faktin se ka pasur vështirësi në identifikimin e autorit, të plagosurve apo personave të përfshirë.
Hetimet po zhvillohen në disa pista, por dyshohet se vrasja është porositur nga persona jashtë burgut, ndoshta kundrejt pagesave apo favoreve të tjera, por nuk përjashtohen edhe pista të tjera.
Ajo që të paktën dihet është se mes Mjacajt dhe Lleshit nuk ka pasur konflikte në burg, kjo edhe për faktin se dy të burgosurit janë lejuar të dalin në të njëjtin orar në ajrim, dhe nëse do të kishte pasur përplasje mes tyre, të paktën kjo gjë do të shmangej. Dhe gjithashtu pista e përplasjes apo konflikteve brenda burgut rrëzohet edhe për faktin se ata njuk kanë pasur kontakte më parë, pra nuk ndanin të njëjtin ambient (dhomë) apo mjedis.
Ndaj dhe grupi hetimor dyshon se vrasja është porositur nga persona jashtë burgut, ndërsa viktima ishte dënuar me burgim të përjetshëm për vrasjen e Agim Hoxhës, krim i ndodhur në Angli.
Gjithashtu hetimet po zhvillohen për futjen e armës së zjarrit në një burg të sigurisë së lartë. Dyshimet janë se arma mund të jetë futur përmes një droni, por nuk përjashtohet pista se ajo mund të jetë futur prej punonjësve të burgut të sigurisë së lartë.
Emri i Mjacajt u lakua nga Ministria e Drejtësisë, pak përpara se ai të kryente krimin, ndërsa njoftohej se do të izolohej në regjimin 41 biss, për shkak të problemeve që kishte shkaktuar në burg. Nuk dihet se çfarë problemesh ka shkaktuar Mjacaj në burgun e Peqinit, përpara momentit që të ekzekutonte Arben Lleshin.
Pas krimit, Mjacaj ka tentuar të marrë peng një prej gardianëve apo të burgosurve, por ky plan nuk i ka ecur dhe ndoshta nën presion, është vetëizoluar në një ambient, nga ku herë pas here kërcënonte se do vriste veten.
Pas disa momentesh ai është vetëdorëzuar, ndërsa në burgun e sigurisë së lartë, kishin mbërritur edhe efektivë të RENEA, FNSH dhe Operacionales, duke përforëcuar masat e sigurisë.
Tashmë mbetet për tu parë nëse Mjacaj do të rrëfejë shkakun e vrasjes së Lleshit dhe sa mund të besohet versioni i tij nga grupi hetimor.
