Inspektori i Patrullës së Përgjithshme të Komisariatit të Policisë Lezhë, Dhurim Mitku, ka kallëzuar dy persona pasi kanë qëlluar në drejtim të tij.
Ngjarja është regjistruar rreth orës 21:00 të mbrëmjes së kaluar në vendin e quajtur “Rruga e Sanxhakut”.
23-vjeçari para grupit hetimor ka deklaruar se 2 shtetas të armatosur sapo e kanë parë kanë qëlluar me armë zjarri në ajër.
Efektivët e komisariatit të Kurbinit menjëherë kanë shkuar në vendin e ngjarjes për të bërë të mundur zbardhjen e kësaj ngjarje.
Pas këqyrjes së vendit të ngjarjes rezulton se është dëmtuar automjeti i efektivit të Policisë, nga qitjet me armë zjarri të kryera nga vetë punonjësi, nga brenda automjetit.
I riu në kallëzimin e bërë në polici thekson ka qëlluar me armë për tu vetëmbrojtur, por në vendngjarje nuk është konstatuar asnjë gëzhojë, gjurmë apo prova të tjera materiale që mund t’iu përkasin shtetasve të kallëzuar nga punonjësi i Policisë.
Duke u nisur nga këto fakte, Agjencia e Mbikëqyrjes Policore ka nisur hetim për kallëzim të rremë për efektivin Dhurim Mitku.
