U zhvillua sot në GJKKO seanca paraprake për personat e arrestuar në kuadër të operacionit “Plumbi i Artë”. Ish-bashkëpunëtori i drejtësisë, të cilit iu hoq statusi Henrik Hoxhës, i dyshuar për disa vrasje, nëpërmjet avokatit kërkoi që t’i rikthehet statusi i bashkëpunëtorit të drejtësisë. Hoxha tha në sallën e gjyqit se ka treguar ngjarje dhe detaje nga krimet më shumë se çdo bashkëpunëtor tjetër. Hoxhaj ka qenë bashkëpunëtor i Nuredin Dumanit dhe grupit të tij në disa vrasje dhe atentate.
Lidhur me një nga ngjarjet kriminale atë të atentatit ndaj biznesmenit Lulzim Masha, Hoxha përkundër deklarimeve të Nuredin Dumanit, tha se porositës ka qenë i shumëkërkuari i drejtësisë që dyshohet se fshihet në Dubai, Eldi Dizdari. Më herët ai kishte deklaruar se kishte pajtuar Skerdi Tasin për të vrarë biznesmenin. Sipas Henrik Hoxhës, Nuredin Dumani i kishte thënë se duhej të vritje djali i Lulëzim Mashës, pasi mashtronte njerëzit dhe u merrte para. Duke qenë se djali fshihej në Maqedoninë e Veriut, “porositësit” kanë tentuar të vrasin babanë e tij, ndërsa për atentatin ishin ofruar 100 mijë euro.
Sakaq, sot në sallën e gjyqit Hoxha deklaroi se nuk kishte dijeni për llogari të kujt kishte marrë Nuredin Dumani këtë porosi. Ndërkohë vetë ky i fundit ka deklaruar se në këtë ngjarje ka qenë i përfshirë, Aleksandër Baho (“Sakati”). Dumani do të rrëfente se pasi Suel Çela (i shpallur në kërkim në kuadër të “Plumbi i Artë) i dha numrin e personit që e donte të eliminuar pronarin e shkollës, ai shkoi në Gjilan të Kosovës ku siguroi armët, motorin dhe paratë për të kryer ekzekutimin e Lulzim Mashës. Sipas Dumanit, ky person është Aleksandër Baho. Për këtë vrasje u ofruan plot 150 mijë euro. Lidhur me atentatin ndaj Lulzim Mashës, SPAK ka marrë të pandehur Henrik Hoxhajn, Skerdi Tasen, Nuredin Dumanin dhe Suel Çelën. Seanca paraprake për të pandehurit me 16 anëtarët e grupeve kriminale, u shty për të premten e ardhshme. Shkak është bërë kërkesa fakti se avokatët merrnin pjesë në një seancë tjetër dhe kërkuan kohë për njohjen me aktet.
