Juanita Castro, motra e Fidel dhe Raúl Castro, e cila punoi me CIA-n amerikane kundër qeverisë së vëllezërve të saj komunistë, ka vdekur në Miami në moshën 90-vjeçare.
Siç raporton Guardian, Florida kishte qenë shtëpia e saj, pasi u largua nga Kuba gati 60 vjet më pare.
Gazetarja María Antonieta Collins, e cila shkroi librin e Juanita Castros në vitin 2009, “Fidel dhe Raúl, My Brothers. The Secret History”, shkroi në Instagram se ajo vdiq të hënën.
“Juanita Castro ishte përpara nesh në rrugën e jetës dhe vdekjes, grua e jashtëzakonshme, luftëtare e palodhur për kauzën e Kubës së saj që unë e dua aq shumë”, shkroi Collins.
Qeveria dhe mediat kubane nuk e kishin përmendur vdekjen e saj deri të mërkurën. Në librin e saj, Juanita Castro, një antikomuniste e vendosur, shkroi se filloi të bashkëpunonte me CIA-n menjëherë pasi Shtetet e Bashkuara dështuan pushtimin e ‘Gjirit të Derrave’ në 1961.
Ajo fillimisht kishte mbështetur përpjekjet e vëllezërve të saj më të mëdhenj për të rrëzuar diktatorin Fulgencio Batista, duke mbledhur para dhe duke blerë armë.
Ajo u zhgënjye kur Fidel Castro u bë një komunist i vijës së ashpër, pasi mori pushtetin në 1959 dhe i dëboi ata që nuk pajtoheshin me qeverinë e tij.
Kur shtëpia e saj në Kubë u bë vend i shenjtë për antikomunistët në fillim të viteve të 60-ta, Fidel Castro e paralajmëroi motrën e tij që të mos përfshihej me “gusanos”, ose krimbat, siç i quajti qeveria ata që kundërshtonin revolucionin.
Ajo tha në librin e saj se ishte gruaja e ambasadorit të Brazilit në Kubë, që e bindi atë të takohej me një oficer të CIA-s gjatë një udhëtimi në Mexico City në vitin 1961.
Ajo tha se i tha agjentit se nuk donte para dhe nuk do të mbështeste asnjë dhunë ndaj vëllezërve të saj apo të tjerëve.
Ajo tha se CIA e përdori atë për të ‘kontrabanduar’ mesazhe, dokumente dhe para në Kubë të fshehura brenda mallrave të konservuara.
Ata komunikuan me të nëpërmjet radios me valë të shkurtra, duke luajtur një vals dhe një këngë nga opera Madame Butterfly, si sinjale se kishin një mesazh për të.
