Është thelluar tragjedia e ndodhur rreth 10 ditë më parë në Hamburg të Gjermanisë kur një skele ndërtimi u shemb duke u rrëzuar bashkë me punëtorët që ndodheshin në të.
Për pasojë 4 shqiptarë humbën jetën në vend, ndërsa i plagosur rëndë mbeti edhe matjani 33-vjeçar Alfred Visha nga Kurdaria. Ai ndodhej në gjendje kome që prej datës 30 tetor, ndërsa një natë më parë mësohet se ka ndërruar jetë, pasi nuk arriti tu mbijetojë plagëve që mori në kantierin e ndërtimit. Alfredi ishte i martuar dhe kishte 3 fëmijë.
Lajmin e ndarjes nga jeta të Alfred Vishës e kanë bërë të ditur vetë familjarët e tij, të cilët pak ditë më parë, kërkuan edhe mbështetjen e shqiptarëve për kurimin e 33-vjeçarit që po luftonte me jetën.
Skelat në të cilat punonin punëtorët shqiptarë të ndërtimit ranë nga kati i tetë i një pallati në një bosht ashensori mëngjesin e 30 tetorit. Ngjarja ndodhi teksa shqiptarët po punonin për ndërtimin e një ndërtese në portin e qytetit Hafen, që do të përfshijë një qendër tregtare, restorante, zyra dhe hotele. 700 punëtorët që punojnë çdo ditë në këtë kantier të madh ndërtimi u urdhëruan të evakuojnë menjëherë vendin e tragjedisë.
