Opozita shqiptare protestoi sot në kuvend, pas rikthimit nga seanca e kaluar kur u përjashtuan 23 deputetë të saj. Pamjet e konfrontimit mes deputetëve të PD-së dhe të PS-së u bënë virale, ndërsa opozita e mbrojti këtë strategji me atë që e quan përpjekje të qeverisë për ta eleminuar. Por për Irena Beqirajn, eksperte financiash dhe zv/ministre e Financave ne vitet 2015-2017, gjatë qeverisjes e PS-së, kjo nuk është rruga e duhur për të ardhur në pushtet. Beqiraj tha në emisionin “Të Paekspozuarit” në MCN TV, se radikalizimi, fushatat negativiste, sulmet dhe shfaqjet e dhunës në parlament nuk e ndihmojnë aspak opozitën.
“Opozita është në një moment që duhet të vlerësojë mirë kushtet që sjellin ndryshimin. Për fatin e PD-së pakënaqësia sot është e dukshme jo vetëm te njerëzit e thjeshtë, por edhe brenda PS-së për mënyrën se si është qeverisur Shqipëria dhe nuk ka nevojë të ridimensionojë apo ripaketojë pakënaqësinë.
Opozita duhet të sjellë një vizion të qartë ndryshimi, ndryshe nga çfarë është vepruar deri tani dhe hapa të dukshëm që janë për këtë ndryshim.
Radikalizimi, fushatat negativiste, sulmet dhe shfaqjet në parlament nuk e ndihmojnë aspak opozitën. Eksperienca ka treguar se opozitat pas një periudhe kohe kaq të gjatë që kanë provuar masat konfliktuale janë të humbura, në vend që ta forcojnë demokracinë e dobësojnë atë dhe mbi të gjitha nuk arrijnë të ngrejnë besimin te njerëzit. Unë e shikoj këtë pamje të opozitë në kuvend si një disavantazh sot për opozitës dhe do t’i sugjeroja opozitës që të ndiqte disa strategji më të moderuara institucionale, në këto institucione që kemi”-tha Beqiraj.
