Të paktën 11 persona kanë mbetur të vrarë pas përleshjeve të armatosura në shtetin meksikan të Sinaloas, të shkaktuara nga operacioni për arrestimin e një prej drejtuesve më të kërkuar të karteleve të drogës, Fausto Isidro Meza Flores, i njohur me nofkën “El Chapo Isidro”.
Autoritetet meksikane konfirmuan të shtunën se 50-vjeçari, i cili renditej mes 10 personave më të kërkuar nga FBI-ja, u arrestua dhe u transportua me avion drejt kryeqytetit, Mexico City.
Operacioni u shoqërua me përplasje të ashpra me armë mes forcave të sigurisë dhe personave të armatosur të kartelit. Dhuna shkaktoi panik në qytetin Guasave, ku disa kamionë dhe biznese u përfshinë nga flakët. Sipas Ministrisë meksikane të Mbrojtjes, shtatë persona të dyshuar si pjesëtarë të kartelit dhe katër ushtarë humbën jetën gjatë operacionit.
Kush është “El Chapo Isidro”?
Fausto Isidro Meza Flores arriti të ngjitej në hierarkinë e krimit të organizuar, duke marrë drejtimin e kartelit Beltrán Leyva. Më vonë, ai krijoi organizatën e tij kriminale, të njohur si Meza-Flores Transnational Criminal Organization.
Shtetet e Bashkuara kishin vendosur një shpërblim prej 5 milionë dollarësh për çdo informacion që do të ndihmonte në kapjen e tij. Ai akuzohet për trafikimin e lëndëve narkotike drejt SHBA-së dhe posedimin e paligjshëm të armëve të zjarrit.
Qeveria meksikane bëri të ditur se arrestimi u bë i mundur edhe falë informacioneve të inteligjencës të siguruara nga administrata e presidentit amerikan Donald Trump, pa dhënë detaje të tjera mbi bashkëpunimin mes dy vendeve.
Meza Flores konsiderohej gjithashtu një aleat i rëndësishëm i fraksionit “Los Mayos”, pjesë e kartelit Sinaloa, të cilin administrata Trump e ka shpallur organizatë të huaj terroriste.
Frika për një tjetër valë dhune
Arrestimi i tij përbën një goditje të rëndësishme për rrjetet kriminale në Meksikë, në një kohë kur karteli Sinaloa është përfshirë prej kohësh në përplasje të përgjakshme me një fraksion rival për kontrollin e territorit në veri të vendit.
Autoritetet në Uashington dhe Mexico City e kanë cilësuar operacionin si një sukses në luftën kundër trafikut të drogës dhe krimit të organizuar.
Presidenti amerikan Donald Trump ka ushtruar vazhdimisht presion ndaj qeverisë meksikane për të shtuar përpjekjet kundër karteleve. Megjithatë, ekspertët paralajmërojnë se arrestimi i drejtuesve të lartë kriminalë mund të shkaktojë përshkallëzim të dhunës, pasi grupet dhe fraksionet rivale përpiqen të marrin kontrollin e territoreve dhe aktiviteteve të paligjshme.







