Katër inspektorë të Agjencisë Kombëtare të Ushqimit (AKU) janë shkarkuar nga detyra pas problematikave të konstatuara në rastin e ngarkesës prej 27 tonësh me mish derri të importuar nga Brazili.
Sipas të dhënave, njëri prej inspektorëve, me inicialet L.B., ushtronte detyrën në Pikën e Kalimit Kufitar në Durrës, ndërsa tre të tjerët ishin pjesë e strukturës së AKU-së në Fier.
Për të katër punonjësit është konstatuar se nuk kanë kryer verifikimin e duhur të dokumentacionit të ngarkesës së kompanisë KING-MIT. Gjithashtu, ata nuk kanë evidentuar shkeljet e konstatuara dhe nuk kanë vendosur masën e duhur administrative në raport me problematikat e rastit.
Për shqyrtimin e përgjegjësive dhe marrjen e vendimit për largimin nga detyra është ngritur një Komision Disiplinor, i cili ka zhvilluar dy seanca dëgjimore me punonjësit përkatës.
Ndërkohë, Inspektori i Përgjithshëm ka urdhëruar verifikimin e ligjshmërisë së të gjitha procedurave administrative të ndjekura nga Drejtoria e Përgjithshme e AKU-së lidhur me importimin dhe kontrollin e ngarkesës me mish derri.
Verifikimi synon të shqyrtojë në mënyrë të plotë dokumentacionin, veprimet e kryera nga inspektorët dhe përgjegjësitë e strukturave të përfshira në këtë proces.







