Ndërsa në Kuvend po zhvillohen diskutimet për projektbuxhetin e vitit 2027, Policia e Tiranës ka njoftuar nisjen e procedimeve penale për 24 protestues dhe vendosjen e gjobave për 28 të tjerë gjatë orëve të fundit.
Masat e përsëritura të policisë, procedimet penale dhe gjobat ndaj pjesëmarrësve kanë shoqëruar protestat e studentëve dhe qytetarëve, të cilat në ditët e para vunë nën presion qeverinë.
Gjatë javëve të protestës, dhjetëra të rinj u përballën me ndërhyrjet e policisë, arrestime dhe procedime penale, ndërsa për momentin protestat janë qetësuar.
Edhe në Parlament, situata duket se i është kthyer ritmit të zakonshëm të seancave plenare. Gjatë fjalës së kryeministrit Edi Rama, deputetët e opozitës u larguan nga salla në shenjë proteste, por më pas u rikthyen dhe vijuan diskutimet me pyetje drejtuar ministrit të Financave, Petrit Malaj.







