Kryetari i Partisë Demokratike, Sali Berisha, ka reaguar lidhur me incidentet e regjistruara gjatë protestës së së shtunës para Ministrisë së Arsimit, ku pati përplasje mes protestuesve dhe demokratëve.
Gjatë një bashkëbisedimi me ndjekësit në rrjetet sociale, Berisha pretendoi se personat që shkaktuan tensionet nuk ishin studentë, por individë të paguar nga qeveria për të provokuar dhe për të krijuar incidente.
Sipas tij, në videot e publikuara nga protesta mund të dallohen persona të moshave të ndryshme, të cilët, sipas pretendimit të tij, nuk kishin lidhje me lëvizjen studentore. Berisha akuzoi gjithashtu mediat pranë qeverisë se kishin qenë të pranishme pranë vendeve ku ndodhën incidentet, me qëllim filmimin e tyre.
Kreu i demokratëve theksoi se Partia Demokratike do të vijojë të mbështesë protestën studentore, duke mohuar se pjesëmarrja e saj synon të marrë nën kontroll lëvizjen apo t’i imponojë asaj simbolet politike të opozitës.
Ai deklaroi se deputetët dhe përfaqësuesit e PD-së kanë qenë vazhdimisht pranë studentëve që prej nisjes së revoltës, duke u ofruar mbështetje dhe mbrojtje përballë ndërhyrjeve të policisë dhe procedimeve gjyqësore.
Berisha bëri gjithashtu të ditur se, sipas tij, mbi 600 studentë kanë përfituar mbrojtje ligjore nga zyra juridike e Partisë Demokratike.
Në përfundim, ai u bëri thirrje forcave të tjera politike opozitare dhe qytetarëve që t’i bashkohen mbështetjes për studentët, duke siguruar se PD do të vijojë të jetë pjesë e protestës, në respekt të karakterit dhe pluralizmit të saj.
