Protestat studentore vijojnë edhe këtë të martë, teksa të rinjtë janë mbledhur sërish në ambientet universitare për të kërkuar ndryshime dhe për të shprehur pakënaqësitë e tyre.
Tubimi i sotëm ka nisur në Universitetin Politeknik, ku një grup studentësh, me pankarta në duar, kanë kërkuar dorëheqjen e kryeministrit Edi Rama.
Kjo është dita e radhës e protestave, të cilat kanë vijuar edhe gjatë ditëve të fundit në disa universitete. Në tubimet e mëparshme, studentët kanë hyrë në auditorë gjatë zhvillimit të mësimit, duke u bërë thirrje bashkëmoshatarëve të bojkotojnë procesin mësimor dhe t’u bashkohen protestave.
Protesta e zhvilluar një ditë më parë u mbyll pa incidente, ndërsa pjesëmarrësit vijuan të shprehin kërkesat e tyre në mënyrë paqësore.
Nga ana tjetër, Policia ka njoftuar se pas hyrjes në fuqi të aktit normativ për tubimet janë vendosur 16 gjoba. Sipas uniformave blu, masat administrative janë marrë ndaj personave që kanë bllokuar rrugët gjatë zhvillimit të protestave.
