Presidenti i Republikës, Bajram Begaj, ka dekretuar datën 9 maj 2027 për zhvillimin e zgjedhjeve të ardhshme për organet e qeverisjes vendore në Shqipëri.
Sipas parashikimeve të Kodit Zgjedhor, zgjedhjet vendore duhet të mbahen gjatë periudhës zgjedhore të pranverës, e cila përfshin katër të diela nga 15 prilli deri më 15 maj.
Në njoftimin e Presidencës bëhet me dije se, përpara marrjes së vendimit, kreu i shtetit zhvilloi konsultime me përfaqësuesit e forcave politike të përfaqësuara në Kuvend, si dhe me Komisionerin Shtetëror të Zgjedhjeve.
Në këtë proces konsultimi morën pjesë Grupi Parlamentar i Partisë Socialiste, Partia Socialdemokrate dhe Komisioneri Shtetëror i Zgjedhjeve. Ndërsa subjektet e tjera politike nuk iu përgjigjën ftesës së Presidentit dhe nuk shprehën preferencat e tyre për datën e zgjedhjeve.
Gjatë konsultimeve, Komisioneri Shtetëror i Zgjedhjeve propozoi 9 majin 2027, duke argumentuar se caktimi i kësaj date do t’u jepte institucioneve më shumë kohë për përgatitjen dhe zbatimin e masave të nevojshme për procesin zgjedhor. Të njëjtën datë mbështeti edhe Partia Socialdemokrate.
Presidenca sqaron se zgjedhja e 9 majit nuk lidhet me asnjë favorizim politik dhe nuk përbën rrezik për cenimin e vullnetit të lirë të zgjedhësve. Për këtë arsye, Presidenti Begaj vendosi t’i japë fuqi ligjore kësaj date përmes dekretit përkatës.
Në përfundim, kreu i shtetit u ka bërë thirrje të gjitha forcave politike që të angazhohen në zgjedhje me kandidatë dhe programe konkrete, duke garantuar një garë të drejtë dhe të ndershme. Ai ka kërkuar gjithashtu respektimin e legjislacionit zgjedhor dhe bashkëpunim të plotë me Komisionin Qendror të Zgjedhjeve, me synimin që procesi të përmbushë standardet më të larta demokratike.
