Rreth 5 mijë kamera trupi (Body Cam) kanë mbërritur në Shqipëri dhe pritet të shpërndahen në të gjitha drejtoritë vendore të Policisë së Shtetit, duke nisur nga Drejtoria Vendore e Policisë Tiranë.Sipas të dhënave paraprake, pajisja me kamerat e reja do të nisë fillimisht me efektivët e Policisë Rrugore, të cilët do t’i mbajnë ato gjatë gjithë kohës së shërbimit. Më pas, procesi pritet të shtrihet në të gjitha strukturat e tjera policore në vend.
Një nga elementët kryesorë të këtij sistemi është mundësia e aksesimit të drejtpërdrejtë të kamerave nga Sallat Operative të Policisë. Parashikohet që kamerat të mund të aktivizohen dhe të monitorohen nga salla përkatëse, pa i lënë efektivit mundësinë për të ndërhyrë në regjistrimin e pamjeve.Ky mekanizëm synon të rrisë transparencën gjatë ushtrimit të detyrës nga punonjësit e Policisë, si dhe të parandalojë rastet e korrupsionit, abuzimit me detyrën dhe ndërhyrjeve të paligjshme policore.
Vendosja e kamerave të trupit pritet të shërbejë gjithashtu si një mekanizëm kontrolli dhe dokumentimi për çdo ndërveprim mes efektivëve të Policisë dhe qytetarëve, duke krijuar një gjurmë filmike të veprimeve të kryera gjatë shërbimit.
Pajisja e të gjitha strukturave policore me këtë teknologji pritet të përbëjë një ndryshim të rëndësishëm në mënyrën e monitorimit dhe kontrollit të punës së efektivëve në terren.
