Numri i aksidenteve rrugore në Shqipëri ka vijuar të rritet gjatë vitit 2026, duke arritur në 1,090 aksidente në periudhën janar–shtator, nga 1,028 të regjistruara në të njëjtën periudhë të vitit të kaluar. Sipas të dhënave më të fundit të Institutit të Statistikave (INSTAT), të publikuara më 27 tetor, rritja është 6%, ndërsa numri i personave të vrarë dhe të plagosur ka arritur në 1,508, kundrejt 1,441 një vit më parë, ose 4.6% më shumë.
Tirana mbetet qarku me numrin më të lartë të aksidenteve rrugore në vend, duke regjistruar 401 raste gjatë nëntë muajve të parë të vitit, nga 306 në të njëjtën periudhë të vitit 2025. Kjo përfaqëson një rritje prej 31%, ndërsa kryeqyteti përqendron tashmë rreth 37% të të gjitha aksidenteve rrugore në shkallë vendi.
Edhe numri i personave të aksidentuar në Tiranë ka pësuar rritje të ndjeshme, duke arritur në 493 të vrarë dhe të plagosur, nga 382 një vit më parë. Kjo do të thotë se pothuajse një në tre persona të aksidentuar në vend gjatë kësaj periudhe është regjistruar në qarkun e Tiranës.
Pas kryeqytetit, numri më i lartë i aksidenteve është regjistruar në Lezhë, me 122 raste, ndjekur nga Durrësi me 117 dhe Vlora me 97 aksidente.Durrësi paraqet një nga rritjet më të forta në krahasim me vitin e kaluar. Numri i aksidenteve është rritur nga 67 në 117, ose me rreth 75%, ndërsa numri i personave të vrarë dhe të plagosur ka kaluar nga 100 në 160.
Në të kundërt, disa qarqe kanë regjistruar përmirësim të treguesve. Shkodra ka shënuar ulje të aksidenteve nga 81 në 49, Korça nga 99 në 81 dhe Lezha nga 138 në 122 raste.
Shtatori, 107 aksidente dhe 130 persona të vrarë e të plagosur
Vetëm gjatë muajit shtator 2026, në Shqipëri janë regjistruar 107 aksidente rrugore, kundrejt 102 në shtatorin e vitit të kaluar, duke shënuar një rritje prej 4.9%.
Nga këto aksidente kanë mbetur të vrarë ose të plagosur 130 persona, nga 135 që ishin regjistruar në shtator 2025. Pavarësisht rritjes së numrit të aksidenteve, numri i përgjithshëm i personave të dëmtuar ka shënuar një ulje prej 3.7%.
Në shpërndarjen sipas qarqeve, Tirana ka regjistruar 32 aksidente gjatë shtatorit, nga 36 një vit më parë. Durrësi renditet i dyti me 19 aksidente, nga vetëm 5 në shtatorin e vitit 2025, ndërsa Korça ka regjistruar 11 raste.
Drejtuesit e mjeteve përgjegjës për mbi 90% të aksidenteve
Një nga treguesit më shqetësues të raportit lidhet me shkaqet e aksidenteve rrugore. Sipas INSTAT, 90.7% e aksidenteve të regjistruara gjatë shtatorit kanë ndodhur si pasojë e sjelljes së drejtuesve të mjeteve.
Në këtë kategori përfshihen shkelje të rregullave të qarkullimit rrugor, si mosrespektimi i sinjalistikës, tejkalimi i normave të shpejtësisë dhe manovrat e papërshtatshme gjatë drejtimit të automjetit.
Të dhënat tregojnë gjithashtu se grup-mosha 0–24 vjeç përfaqëson peshën më të lartë të aksidenteve sipas grup-moshës së personave të përfshirë në drejtimin e mjeteve, me 27.1% të totalit të rasteve të regjistruara gjatë shtatorit.
Një tjetër element është shpërndarja e aksidenteve sipas ditëve të javës dhe orareve. Dita e premte rezulton më problematikja, me 16.8% të aksidenteve, ndërsa e shtuna ka regjistruar peshën më të ulët, me 11.2%.
Sipas orarit, përqendrimi më i lartë i aksidenteve është regjistruar në intervalin 19:00–24:00, gjatë të cilit kanë ndodhur 26.2% e aksidenteve të muajit.
Të dhënat e nëntëmujorit tregojnë se rritja e aksidenteve rrugore nuk është e njëtrajtshme në të gjithë territorin, por përqendrohet veçanërisht në disa qarqe, me Tiranën dhe Durrësin që kanë kontribuar ndjeshëm në shtimin e rasteve.
Ndërkohë, fakti që mbi nëntë në dhjetë aksidente të shtatorit lidhen me sjelljen e drejtuesve të mjeteve evidenton rëndësinë e respektimit të rregullave të qarkullimit, kontrolleve rrugore dhe masave parandaluese për sigurinë në rrugë./ekofin.al
